Бушати: Албанија поддржува дијалогот меѓу Србија и Косово

Албанија безрезервно поддржува „добро воспоставен" дијалог меѓу Србија и Косово, изјави албанскиот министер за надворешни работи Дитмир Бушати.

„Сметаме дека процесот треба да ги нормализира овие односи и да донесе взаемно признавање. Преку овој процес, неопходно е да се изгради внатрешен консензус во Косово", изјави Бушати за „Јета не Косове“.

Бушати истакна дека Албанија ќе поддржи добро поставена платформа за дијалог и додаде дека Албанија и Косово имаат „меѓусебна комуникација и интеракција", кога станува збор за дијалогот меѓу Косово и Србија, пренесува порталот Приштина инсајт.

Запрашан за идејата за „размена на северниот дел на Митровица за Прешевската долина", Бушати тврди дека тој никогаш не слушнал за идејата за сецесија од територијата.