Жерновски го бојкотирал говорот на Иванов, за СДСМ говорот е „срамен“
„Ја напуштив салата на ОН за време на говорот на Иванов, бидејќи не сакаме и нема да дадеме легитимитет на неговиот скандалозен настап, полн со манипулации, омраза и создавање непријатели. Отворениот повик за бојкот на референдумот и грубата злоупотреба на говорницата, е всушност апел за самоизолација, но и крајна неодговорност кон сегашните и идни генерации“, објави Жерновски на својот ФБ профил.
По говорот на Иванов реагираа и од владејачкаа СДСМ. Од партијата преку соопштение велат дека обраќањето на Иванов било срамно, но, според нив, тоа не може да го расипе, како што наведуваат, блескавиот меѓународен имиџ што Македонија го изгради во изминатите месеци.
„Во деновите клучни за иднината на државата и нејзините граѓани, Иванов остана доследен на неговото деструктивно и антидржавно однесување. Иако и самиот знае дека нема да успее, Иванов никако не ја напушта својата идеја за изолација на Македонија“, пишува во соопштението на СДСМ.
Претседателот Иванов на Генералното Собрание на ОН зборуваше против Договорот со Грција и рече дека нема да гласа на референдумот.
Иванов за време на Генерално Собрание се сретнал и со Генералниот секретар на Обединетите Нации Антонио Гутереш. И на средбата Иванов го повторил својот став дека ЕУ и НАТО не смеат да бидат алиби за лош договор со кој се отвораат многу повеќе прашања, одошто се затвораат, велат од Кабинетот на Претседателот.
Генералниот секретар на ОН, Гутереш, во однос на претстојниот референдум рекол дека македонскиот народ треба сам да ја донесе одлуката и дека таа одлука ќе ја почитуваат.