Новости за 28.11.2018

Американскиот претседател Доналд Трамп изјави дека би можело да ја откаже планираната средба со рускиот претседател Владимир Путин на маргините на самитот Г20 во Аргентина оваа недела поради руското приведување украински морнари. Во интервју за Вашингтон пост тој рече дека чека на целосен извештај од неговиот тим за национална безбедност околу руското запленување на три украински бродови и нивниот екипаж во близина на Крим на 25 овој месец. „Не сакам агресија воопшто“, изјави Трамп. Дванаесет од 24 украински морнари добија двомесечен притвор.

Претседателот на Косово Хашим Тачи на состанокот во Вашингтон со советникот на американскиот претседател за национална безбедност Џон Болтон добил поддршка за постигнување спогодба за нормализација на односите со Србија, е соопштено од кабинетот на Тачи. Најавено е дека Тачи во рамките на посетата на Соединетите држави ќе се сретне и со поранешниот претседател на САД Џорџ Буш.

Украинскиот претседател Петро Порошенко изјави дека Русија го зголемила бројот на тенкови поставени во близина на границата со Украина. Во меѓувреме, Соединетите Држави побараа од европските сојузници да ги зацврстат мерките против Москва.

Во местото Кентбери во Англија, на 66-годишна возраст почина познатиот македонски драмски писател Горан Стефановски. Стефановски е роден во Битола во 1952 година и е еден од најплодните драмски автори во современата македонска книжевност. Автор е на драмите „Диво месо“, „Лет во место“, „Јане Задрогаз“, „Дупло дно“, „Тетовирани души“, „Демонот од Дебар маало“ и многу други. Беше еден од креаторите на популарната ТВ серија „Бушава азбука“ и е автор на неколку телевизиски драми. Добитник е на наградите „Стале Попов“... Читать дальше...

Унгарија го отфрли американското барање да екстрадира двајца руски дилери на оружје и наместо тоа ги вратила во Русија, соопшти Стејт департментот. Портпаролката Хедер Нојерт изјави дека САД се разочарани од одлуката на унгарската валада да ги екстардира во Русија Владимир Љибушин постариот и Владимир Љибушин помладиот. Според Нојерт, не е сигурно дека тие би можеле да се најдат пред руски суд. Таа додаде дека со ваквата одлука на Будимпешта се покренува прашањето во врска со унгарската заложба за соработка во спроведувањето на законите.

Првиот човек на Обвинителството за организиран криминал и корупција Вилма Русковска изјави дека веќе се собрани дел од доказите за бегството на поранешниот премиер Никола Груевски и оти со 100 процентна сигурност немаат утврдено дали тој легално ја поминал македонската граница. Според неа, е неблагодарно во предистражна постапка да се лоцира одговорност за бегството на Груевски и додаде дека е потребно време да се утврди кога и на кој начин избегал од државата.

Во Македонија ќе биде променливо облачно со врнежи од дожд. Попладне во источните делови врнежите ќе бидат поројни. Максималната температура ќе се движи до 15 степени. Во Скопје и околината слично време со дневна температура до 12 степени.