Новости за 03.01.2019

Американскиот претседател Доналд Трамп изјави дека добил од лидерот на Северна Кореја Ким Џонг Ун „одлично писмо“ и оти веројатно наскоро повторно ќе се состане со него. „Воспоставивме навистина многу добри односи. Веројатно ќе се состанеме“, изјави Трамп, додавајќи дека не треба да се брза околу тоа. Трамп претходно на Твитер напиша дека „едвај чекал да се состане со Ким Џонг Ун, бидејќи Северна Кореја поседувала одличен економски потенцијал“.

Состанокот на американскиот претседател Доналд Трамп со лидерите на Конгресот во средата во Белата куќа не донесе договор за ставање крај на делумното затворање на владата. Трамп претходно изјави дека тоа ќе трае „колку што е потребно“.

Кинеска вселенска сонда без екипаж денеска слета на темната страна на Месечината во истражна мисија. Со тоа Кина стана првата земја која има објект на далечната страна на Месечината. Сондата била лансирана на 8 минатиот месец и носи роботско возило дизајнирано да ја истражува површината на Месечината. САД од 1969 до 1972 година испратија 12 луѓе на Месечината, но ниту една од тие мисии не беа на темната страна, бидејќи од таму е невозможна директна комуникација со Земјата.

Американскиот претседател Доналд Трамп изјави синоќа дека границата со Мексико била „како сито“, жалејќи се дека во првите часови од Новата година силите за безбедност морале да интервенираат со солзавец за да спречат влез на околу 150 мигранти кои се обиделе да ја пробијат оградата на преминот кај Тихуана. Трамп ова го изјави на состанокот во Белата куќа со претставници на Конгресот. Во САД веќе 13 дена има делумна блокада на сојузните органи поради несогласувањата меѓу Белата куќа и Конгресот за буџетот за изградбата на тој ѕид.

Демократската партија ја презема контролата врз Претставничкиот дом на американскиот Конгрес кој денеска ја почнува 116 сесија. Ненси Пелоси која четири години беше спикер на Претставничкиот дом од 2007 година, ќе и се врати на таа функција која ќе ја извршува најмалку до изборите во 2020 година. 235 демократи кои победија на изборите во ноември ќе претставуваат мнозинство во Претставничкиот дом кој има 435 пратенички места. Досега контролата врз овој дом ја имаа републиканците на претседателот Доналд Трамп. Читать дальше...

Во Македонија ќе биде облачно и студено со врнежи од снег особено претпладне, и повеќе во западните и јужните делови од земјава. Ќе дува засилен северен ветер најизразен долж Повардарието и ќе има услови за појава на навеви од снег. Утринската температура ќе се движи од минус девет до минус еден, а дневната од минус пет до еден степен. Во Скопје и околината слично време со утринска температура околу минус еден, а дневната до еден степен.