Новости за 16.01.2020

Русите се надеваат на подобро од најавената нова влада, откако рускиот премиер Дмитри Медведев ја објави оставката на неговиот кабинет. Одлуката беше објавена откако претседателот Владимир Путин имаше обраќање во Федералното собрание.

Пресудите на судот за човекови права во Стразбур против државата укажуваат на слабостите во македонското судство, велат упатените. Според последните пресметки, државата за 153 пресуди во изминативе десетина години исплатила над 2 милиона евра.

Американскиот претседател Доналд Трамп и турскиот лидер Реџеп Таип Ердоган телефонски разговале за Иран, Сирија и Либија, соопштено е и во Вашингтон и во Анкара. Тензиите растат меѓу Западот и Иран по признавањето на Техеран дека неговите сили ненамерно го собориле украинскиот патнички авион на 8 јануари. Во меѓувреме, германската канцеларка Ангела Меркел најави состанок на лидерите на Турција, Русија, САД, Британија, Кина, Франција и Италија во Берлин на 19 јануари за да се разговара за конфликтот во Либија.

Јапонската фирма „Тојота“ соопшти дека ќе инвестира 400 милиони долари за производство на летачки автомобили кои, како што е соопштено, ќе обезбедуваат „брз, тивок и достапен воздушен транспорт“. Инвестицијата на Тојота ќе оди кај „Џоби Авиејшн“ фирма која развива електрични летала кои можат да полетуваат вертикално.

Турската државна новинска агенција Анадолија соопшти дека египетската полиција упаднала во нејзините простории во Каиро и привела четворица вработени. Анадолија наведува дека нема информации за тоа каде биле одведени вработените, меѓу кои и еден турски државјанин. Анкара го осуди упадот на полицијата и побара пуштање на вработените на слобода. Каиро пак соопшти дела упадот бил во рамките на акцијата за разоткривање на заговори од страна на Муслиманското братство и од земјите кои го поддржуваат, што се однесува и на Турција.

Албанија и Косово сакаат да формираат заеднички фудбалски куп под името „Мајка Тереза“, соопшти Албанската фудбалска федерација, наведувајќи дека во врска со ова веќе било испратено писмо до УЕФА и ФИФА. Победникот на овој куп би играл во Европската лига. Ваквиот проект се очекува да предизвика негодување во Србија која не ја признава независноста на Косово и ги обвинува Тирана и Приштина за спроведување на план за создавање „Голема Албанија“.

Претставничкиот дом на американскиот Конгрес испрати резолуција за отповикување на претседателот Доналд Трамп до Сенатот. Со тоа се создадени услови за почеток на судењето на шефот на Белата куќа во горниот дом на парламентот. Трамп е обвинет за злоупотреба на функцијата и за опструкција на Конгресот во врска со наводите дека вршел притисок врз Украина да покрене истрага против неговиот политички ривал Џо Бајден, можен кандидат на демократита на претседателските избори на 3 ноември годинава и оти... Читать дальше...

Денеска ќе се задржи стабилно време, по одделни котлини со појава на магла и ниска облачност, особено во претпладневните и вечерните часови. Утринската температура ќе биде минус шест до еден, а дневната од три до 13 степени. Во Скопје и околината слично време. Утринската температура ќе биде околу минус два, а дневната ќе достигне до шест степени.