ЕУ очекува соработка со стабилна Влада која ќе прави реформи
Во заедничката писмена изјава на еврокомесарот за проширување, Оливер Вархеји, и шефот на дипломатијата на ЕУ, Јосеп Борел, се нотирани забелешките на ОБСЕ/ОДИХР за изборниот процес, со надеж дека за брзо време ќе бидат спроведени препораките што ги дала оваа организација.
„Според првичните сознанија и заклучоци на меѓународните набудувачи од Кабинетот на ОБСЕ/ОДИХР, изборите генерално се одвиваа добро прилагодени на пандемијата, но била нарушена правната стабилност со значителни ревизии на законската рамка и последователните владини уредби. Откако ОБСЕ/ОДИХР ги даде своите препораки за идните избори, Европската унија очекува сите политички чинители, релевантни институции и засегнати страни да продолжат да работат заедно за да ги спроведат тие препораки многу пред следните избори. Со нетрпение очекуваме да работиме со силен Парламент и стабилна коалициска Влада која треба да ја испорача стратешката цел на земјата за интеграција во ЕУ и да одговори на очекувањата на граѓаните. Ние сме посветени да продолжиме заеднички да реагираме на пандемијата со Ковид-19 и последиците од неа“, се вели возаедничката изјава на двата високи функционери на ЕУ.
Изборите генерално добро спроведени, оцени ОБСЕ/ОДИХР
ДИК - изборни резултати, мандати, хакирања, реакции и оценки
Тие потенцираат дека очекуваат властите да продолжат да ги исполнуваат обврските на земјата во ЕУ и да го одржат и забрзаат спроведувањето на реформите поврзани со ЕУ, особено во областа на владеењето на правото, борбата против организираниот криминал и корупцијата, како и да ги зајакнуваат добрососедските односи.
„Европската унија ќе продолжи да ја поддржува Северна Македонија на нејзиниот пат кон ЕУ и со нетрпение очекува што поскоро одржување на првата меѓувладина конференција“, стои во изјавата на Вархеји и Борел, по предвремените парламентарни избори во Северна Македонија.