Пет приговори до ДИК за постапката на гласање
До Комисијата два приговори поднела партијата Демократи кои се однесуваат за неважечките гласачки ливчиња. Приговори попладнево поднесоа и Работничка партија МОРО, СДУ и Интегра. Пред ДИК да ги објави неофицијалните конечни резултати, партијата на Јанко Бачев Единствена Македонија доставила барање за увид во неважечки ливчиња. До 21 часот вечер е рокот кога може да се поднесе приговор за постапката за гласање.
До утре, пак, до 19 часот и 30 минути е рокот до кој партиите треба да поднесат приговори за сумирањето и утврдување на резултатите од предвремените парламентарни избори.
ДИК била под компјутерски напад, но има проблем и со апликацијата
ДИК со задоцнување вчера ги објави неофицијалните конечни резултати од изборите поради, како што изјави претседателот Оливер Деркоски, хакерски напад на веб-страната на Комисијата.
Предвремените парламентарни избори се одржаа под посебни услови поради пандемијата со КОВИД -19. Се гласаше во понеделникот кога се изјаснуваа лицата со КОВИД -19 и во самоизолација, во вторникот кога гласаа болните, изнемоштените и хронично болните и затворениците и во средата кога беше изборниот ден. Победи коалицијата „Можеме“ предводена од лидерот Зоран Заев кој освои 46 мандати на изборите, опозициската ВМРО-ДПМНЕ има 44, ДУИ освои 15 мандати, Алијансата на Албанците и Алтернатива 10, Левица 2 и ДПА 1 мандат.