Вицепремиерката Царовска контра Боки 13 за „Меѓународен сојуз“
Вицепремиерката Мила Царовска негира дека додека била министерка за труд и социјала политика му давала поддршка на Бојан Јовановски - Боки 13. Нејзината реакција следува откако Јовановски, како првообвинет за случајот „Меѓународен сојуз“, денеска пред судот рече дека неговата организација функционирала како министерство за социјала и дека за тоа имал владина поддршка, споменувајќи ја и Царовска како помагател.
„Парите кои се уплаќани кај Љиљана Тодоровска и Јасна Мандиќ се за авторските права за идејното решение за што се е легално и имаат платено данок. Поддршка имав и од Мила Царовска тогашната мининстерка за социјала, од Оливер Спасовски, а бевме на прием и кај екс премиерот Зоран Заев. Ние всушност функцииниравме како министерство за сицијала згрижувавме деца и сега некој мојата хуманост ќе ја доведува во прашање“, рече Јовановски во неговите воведни зборови на денешното судско рочиште.
Продолжува судењето за „Меѓународен сојуз“ на Боки 13
Боки 13: За „Меѓународен сојуз“ имав владина поддршка
Царовска вели дека остро демантира каква било поврзаност со проект на ГП Пелистер и каква било соработка со невладината Меѓународен Сојуз, и најавува и тужба против Боки 13 за клевета.
„Ја информирам јавноста дека со госпоѓата што ја споменува Јовановски во неговата изјава ниту некогаш сум соработувала, ниту лично ја познавам. Изјавата на Јовановски е целосна невистина и директен напад и уривање на мојот углед и достоинство за што ќе ги преземам сите правни мерки“, вели Царовска.
Во случајот „Меѓународен сојуз“ се обвинети Бојан Јовановски - Боки 13, Јасна Мандиќ, Фросина Ременски, Миле Јовановски и Христина Блажеска за кривичните дела „измама“ и „перење пари“.