На Kосово 728 новозаразени, мерки за затворања
Мерките предвидуваат од вечерва во 20 часот до понеделник во 5 часот наутро, да се затворат сите бизниси, трговските и рекреативни центри, супермаркетите и угостителските објекти.
Од оваа одлука се исклучуваат пекарниците, аптеките, малите продавници и бензинските пумпи, јавните и приватните здравствени институции, како и фирмите кои се занимаваат со производство, достава и продажба на есенцијални стоки. Не се опфатени ниту институциите кои управуваат со пандемијата, економските оператори и превозниците кои обезбедуваат функционирање на синџирот на снабдување.
Покрај оваа одлука од вечерва до понеделник наутро, се забранува влегувањето во и излегувањето од Приштина, Косово Поле, Гњилане, Обилиќ, Ѓаковица, Подујево и Штимље.
Забраната не се однесува на здравствениот персонал и безбедносните служби, граѓаните кои имаат потреба од здравствени услуги и за производство, набавка и продажба на есенцијални стоки, економските оператори и превозниците кои обезбедуваат функционирање на снабдувањето, како и градежните претпријатија и операторите кои изведуваат јавни работи.
Според последниот извештај на Институтот за јавно здравство на Косово, вчера се извршени 1.827 тестирања, од кои како носители на вирусот резултирале 728 лица. Во истиот период се регистрирани се 12 нови смртни случаи на заболени од Ковид-19, со што бројката на жртви на епидемијата достигна до 732.