Обвинителство истражува, пратениците со обвинувања за незаконското кредитирање од „Еуростандард банка“

Група штедачи во „Евростандард банка“ протестираа пред Собранието, додека во него се одржуваше собраниска надзорна расправа за причините кои довеле до стечај на Еуростандард банка. Како сведоци во собраниската комисија биле повикани гувернерката на Народна Банка Анита Ангеловска Бежовска и мнозинскиот акционер во банката Трифун Костовски, но и јавниот државен обвинител Љубомир Јовески. Јовески пред пратениците истакнал дека се водат две посебни постапки за стечајот на „Еуростандард банка“ но не откри детали за да, како што вели, не го загрози истражниот процес и засегнатите од него. Тој истакна дека ќе бидат истражени сите лица за кои доказите и фактите ќе покажат дека се вмешани во стечајот на банката.

Гувернерката на Народната банка Анита Ангеловска Бежовска рече дека од 2013 година преземени се 70 редовни и вонредни мерки за спас на банката, од кои 40 во последниве две години. И ја одземале дозволата за работа на банката откако сопствениците не обезбедиле пари за докапитализација на банката, односно таа веќе немала пари за нормално работење.

Сопственикот на Еуростандард банка бара широка истрага

Мнозинскиот акционер во банката, бизнисменот Трифун Костовски обвини дека се работи за организиран криминал.

„Се работи за големи пари и за голем криминал. Парите, како и полжавот имаат траги. Со стечајот фактички трагите се кријат, ако сакате да учествувате сите заеднички во ваквото покривање на криминал, повелете“ изјави во Собранието Костовски.

Тој нагласи дека и претходно состојбата на банката била десет пати полоша отколку во моментот кога е донесена одлука за стечај, како и дека одлуката е донесена без функционално Собрание како највисоко тело кое ја контролира работата на Народната банка и без формирана Влада.

Пратеникот од ВМРО-ДПМНЕ Антонио Милошоски обвини дека дека 29 струмички фирми блиски до семејството Заеви со месеци наназад не ги плаќале кредитите, меѓу кои и „Сара инженеринг”, за која, како што вели тој, е фирма на Вице Заев, „Глобал Медиа Груп”, како и „Тритерол”, бизнис партнери на Зоран Заев како поранешен градоначалник, со месеци наназад не ги плаќале кредитите во Еуростандард банка.

Костадин Костадинов од СДСМ, пак, на собраниската расправа изјави дека меѓу компаниите кои биле кредитирани од страна на Еуростандард банка, без покритие, се и компании, за кои тој тврди дека се во сопственост на бизнис партнер на лидерот на ВМРО-ДПМНЕ Христијан Мицкоски. Костадинов ги посочи компаниите „Јанев трејд“ „Ведра мини“ и „Минка ДА“ како компании на партнер на Христијан Мицкоски во бизнисот со хидроелектрани.

Еуростандард банка ја изгуби дозволата за работа во август поради неконтролираното преземање ризик за кредитирање и големото издвојување на резервации за кредити кои не се враќале на време.над 70% од клиентите со заштеди до 30 000 евра ги подигнаа средствата кои им беа заробени додека останатите 780 депоненти кои имаат поголеми износи остатокот ќе треба да си го бараат од стечајната маса.