Бајден: Историска пресуда против Младиќ
Американскиот претседател Џо Бајден ја поздрави денешната одлука на Жалбениот совет на Меѓународниот кривичен трибунал за поранешна Југославија со потврдувањето на првостепената пресуда против Ратко Младиќ, со која беше осуден на доживотен затвор, оценувајќи ја како „историска пресуда која покажува дека оние кои извршиле ужасно злосторствата ќе одговараат”, со надеж дека ќе ја почитуваат и лидерите во регионот.
„Таа историска пресуда покажува дека оние кои ќе извршат ужасни злосторства ќе одговараат. Со тоа, исто така, се потврдува нашата заедничка определба да ги спречиме идните злосторства каде било во светот, истакна Бајден“, пренесува Гласот на Америка.
Ратко Младиќ правосилно осуден на доживотен затвор
Тој потсети дека пред речиси 26 години, „Младиќ наредил убиство на околу 8.000 невооружени мажи и момчиња“, командувал „со бруталната долгогодишна опсада на Сараево и тој е одговорен за многу други злосторства“.
„Соединетите Држави помогнаа во предводењето на меѓународните напори за прекин на злосторствата во Босна и Херцеговина, да се изведат пред лицето на правдата оние кои извршија злосторства таму и во други делови на поранешна Југославија и да се воспостави траен мир во земјата и поширокиот регион“, рече Бајден .
Тој исто така ја изрази благодарноста на Америка за неуморната работа на Хашкиот трибунал во изминатите две децении во случаи поврзани со конфликтот на Балканот и сите оние чија посветеност ја овозможи денешната пресуда.