МЗ: 167 лица се заразиле од ковид по примени две вакцини
Министерството за здравство денеска соопшти дека од вкупно 416.614 лица кои се вакцинирале со две дози против коронавирусот, 167 се заразиле 14 дена по примента втора доза.
„Ова е показател дека бројот на заразени од вакцинирани е многу мал, и потврдува дека вакцината е корисна и претставува единствен начин да се смени сликата зa пандемијата“, се вели во соопштението на Министерството.
Податоците на институцијата покажуваат дека во период од 1 до 31 јули регистрирани се вкупно 809 случаи на позитивни, а од нив 82 лица се заразиле по поминати 14 дена после вакцинација во втората доза.
Нов бран на Ковид-19, мерки засега нема
„Ова укажува на фактот дека вакцината е ефикасна само кога се примени две дози и кога од примената втора доза има поминато повеќе од 14 дена“, соопшти Министерството.
Меѓу позитивните, има вакцинирани со Синофарм, Астра Зенека, Спутник В, Фајзер, а има и заразени кои се вакцинирале во странство со вакцината на Модерна.
Министерството апелира дека во овој период важно е граѓаните да покажат што поголем интерес за вакцинација и да се вакцинираат, бидејќи, како што посочуваат, само со колективен имунитет може да се спречи мутирањето на коронавирусот 2 и неговото рапидно ширење.
Досега во земјава се детектирани 30 случаи на делта варијантата.