Во Македонија во моментов активни три пожари
Портпаролката на Центарот за управување со кризи (ЦУК), Надица Вчкова, претпладнево информираше дека во моментов во Македонија има три активни пожари - кај селото Раовиќ, во Општина Сарај, во атарот на селата Ракле, Никодин и Топлица, во Општина Прилеп и нов пожар над изгаснатиот, кај село Нивичино, во Струмичко.
„Пожарот кај селото Раовиќ, Општина Сарај е се уште активен и утрово се забележува мало чадење на сртот од планината кон Матка, а исто така чадење се гледа, но со помал интензитет кај Осој, на линијата помеѓу селата Буковиќ, спрема Чајлане. Во текот на вчерашниот ден на негово гаснење се интервенираше од воздух со два армиски хеликоптери“, изјави Вчкова.
Пожарот во атарот на селата Ракле, Никодин и Топлица, во Општина Прилеп, кој е на непристапен терен, утрово е со многу слаб интензитет.
Намален бројот на активни пожари, се утврдуваат штетите и причините
Според Вчкова, започнат е нов пожар над изгаснатиот, кај село Нивичино, во Струмичко. Пожарот е на непристапен терен, а од рано утрово на терен се излезени пожарникари и лица од шумско стопанство „Беласица“, додека пожарот во атарот на село Барово, во Демир Капија е веќе целосно изгаснат.
Од ЦУК ги повикуваат граѓаните доколку забележат одредени сомнителни места, каде е присутен оган или дим, да ги известат надлежните служби во најблиските институции или да се јават на бесплатниот телефонски број за итни повици на ЦУК - 195. Апелираат, исто така, овој број да не се злоупотребува за лажни повици, што значително би ја отежнале работата на гаснењето на постоечките пожари.