Најлошо деноноќие во тетовскиот ковид-центар од почетокот на епидемијата, 9 починати
Наместо во изолација, полицијата нашла две тетовки во кафеана
„За 24 часа имавме 209 амбулантски прегледи што укажува дека сè уште ќе има нови хоспитализации за жал. Во моментов има 124 хоспитализирани пациенти од кои 18 се нови, како максимум во цела пандемија. Починатите се сите над 65 години, со коморбидитети. Друг проблем е што имаме ситуации каде има пациенти со ковид, но примарни им се болести на срцето и други органи, за кои ние моравме да се консултираме во Скопје. Затоа вчера имавме транспорт на три пациенти во болницата „8-ми Септември“, изјави д-р Гзим Нуредини од Ковид центарот во Тетово.
Секојдневните приеми, како што рече, но и пациенти кои се по три недели на лекување во болница уште повеќе ја комплицира состојбата во Тетовската болница. Сите пациенти имаат други сериозни болести.
„Не е суштина во кревети, не може цела болница да ја блокираме. Имаме инфаркти секој ден, имаме крварење во желудникот и тие ни се потенцијали за умирање. На хирургија има повредени и не може да се земат сите анестезиолози. Нормално дека имаме капацитети, ама не би сакале и немаме намера да се прошириме зашто ќе биде полошо за тие што се веќе хоспитализирани, па некако да видиме со Скопје да ни отворат врата за може полесно да ги третираме овие што ги имаме“, објасни д-р Нуредини.
Тетово е еден од градовите најжестоко погодени од новиот бран на пандемијата.