Филипче- се разгледуваат светските искуства за брзи тестови за учениците

Министерот за здравство Венко Филипче денеска на прес конференцијата по повод отвореањето на пунктот за вакцинација во малата сала во спортскиот центар Борис Трајковски во Скопје рече дека се разгледуваат некои светски искуства за тоа што се прави во училиштата во однос на брзи тестови кај децата.

„Сето тоа се разгледува од страна на експертите. Засега не се препорачуваат никакви дополнителни мерки, но може да донесеме и други препораки согласно тоа како се одвива сликата со пандемијата“, рече Филипче.

Владата донесе одлука училишната настава од први септември да почне со физичко присуство за сите ученици, а да се одвива под посебни мерки и протоколи. Во моментов во државата според последните податоци од Министерството за здравство има 12 673 активни случаи на заразени со ковид19.

Малку рестрикции, малку „моменти на среќа“ за помасовна вакцинација

Инаку Филипче рече и дека единствен начин за намалување на заразата е вакцинацијата, наведувајќи дека вкупниот број граѓани кои досега се вакцинирани со најмалку една доза се близу 700 илјади, од кои 510 илјади ја примиле и втората доза.

„Она што е карактеристично и интересно е тоа што во последниот период значајно расте интересот за вакцинација на помладите граѓани, особено од 18 до 40 години и сега таа бројка изнесува 170 илјади вакцинирани граѓани, што според анализите е 26 проценти од вкупно население во тие возрасни групи“, рече Филипче.

Наставниците подготвени, но чекаат насоки за старт на учебната година

Тој смета дека можеби вакцината против коронавирусот ќе стане и сезонска и оти ќе биде потребна и трета доза за што, според него, зборуваат и голем број студии.