Бугарија инсистира нивните барања кон Македонија да се поврзат со ЕУ-преговорите
Во засебната изјава поднесена до Советот на ЕУ во врска со отпочнувањето на преговорите со Македонија, Бугарија најавува дека нема да отстапи од своите барања. Во документот приложен од страна на бугарската делегација во ЕУ, официјална Софија објаснува дека формулацијата од заклучоците на Советот на ЕУ на 14 декември за „одржување на првата меѓувладина конференција што е можно поскоро по усвојувањето на преговарачката рамка“ не претставува никаков автоматизам помеѓу усвојувањето на наведената рамка и одредувањето на датум за првата меѓувладина конференција меѓу Македонија и ЕУ.
Софија најавува дека ќе го услови усвојувањето на преговарачката рамка со „инкорпорирање на дополнителна одредница за отворање на кластерот „Фундаменти“ (првиот кластер што се отвора во преговорите) во форма на патоказ за имплементација на Договорот за пријателство.
Дополнително Бугарија најавува условување со контроверзните историски ликови, олеснување на бугарските инвестиции во Македонија, Коридорот 8, и прекин за барањето за признавање на „македонско малцинство“ во Бугарија кое таа го смета за неосновано.
Бугарија исто така бара Северна Македонија да се именува исклучиво со долгото име „Република Северна Македонија“ за да се „разликува“ од регионот Северна Македонија.
Софија смета дека Договорот за добрососедски односи „мора да стави ефективен крај на сите барања засновани на погрешно толкување на историјата“.
Во последниот дел од изјавата на Бугарија се вели дека и покрај „кампањата на омраза кон Бугарија во Република Северна Македонија“, С Македонија „остана отворена за дијалог во секое време“. Интерес на Бугарија, се вели во документот, е да се изнајде одржливо решение за отворените прашања со Република Северна Македонија, а не одложување на процесот на пристапување кон ЕУ. Софија жали што Македонија не се посветила „значително“ на преговорите со Бугарија.
„Бугарија останува посветена на продолжување со консултациите. Бугарија не го оспорува сувереното право на граѓаните на Република Северна Македонија да се самоидентификуваат како сакаат. Бугарија меѓутоа не може да толерира тој процес на градење на идентитет да се води преку опозиција и омраза кон Бугарија и преку политички мотивирано културно присвојување“, пишува бугарската делегација.
Македонија повторно не го доби датумот што го прослави
Во Софија се смета дека не се можни „брзи решенија“ бидејќи односите меѓу двете земји биле во „деликатна фаза“.
„Неприменувањето од страна на Република Северна Македонија на правно обврзувачки договор не ѝ овозможува на Бугарија да верува дека необврзувачки декларации и изјави ќе помогнат да се реши ситуацијата освен ако има соодветни барања внесени во преговарачката рамка“, стои во документот.