Владата на Мали негира дека има платеници од руската Вагнер група
ЕУ воведува санкции за руските платеници од Вагнер груп
Владата на Мали „официјално ги демантира тие неосновани обвинувања за наводно распоредување на припадници на приватна компанија за обезбедување во Мали“, се наведува во соопштението објавено синоќа, во кое се додава дека се бараат докази од независни извори.
Околу 15 западни земји, меѓу кои и Франција и Германија, пред два дена го осудија распоредувањето на платеници на руската приватна паравоена група.
„Остро го осудуваме распоредувањето на платеници на територијата на Мали“, се наведува во нивното заедничко соопштение во кое се осудува и „вмешаноста на руските власти кои пружаат материјална поддршка за распоредувањето на групата Вагнер во Мали“.
Вашингтон не беше потписник на заедничкото соопштение, но американскиот државен секретар Ентони Блинкен претходно овој месец го предупреди Мали да не ги прифаќа платениците на Вагнер, велејќи дека таков договор може дополнително да ја дестабилизира земјата.
Руските власти во неколку наврати демантираа дека имаат поврзаност со групата Вагнер, чии платеници се присутни во некои африкански земји.
Владата на Мали завчера соопшти дека во земјата има „руски обучувачи“, како дел од обидите за зајакнување на оперативните капацитети на националните безбедносни сили.
Во Мали од 2013 година има мировна мисија на ОН. Истовремено со таа мисија, од 2013 година, Франција предводи воена акција, со помош на оружените сили на Мали, против екстремистичките организации на северот на земјата.