Курти нема да дојде на Преспа форумот

Поради средба со претставници на Организацијата на воени ветерани на Ослободителната војска на Косово (ОВВ ОВК), кои протестираат косовскиот премиер Албин Курти го откажа учеството на Преспа форумот 2022 во Охрид. Тие протестираат против законот за минимална плата што е влезен во собраниска процедура, јави дописникот на МИА од Приштина.

Во денешното обраќање пред пратениците, Курти изјави дека утре, заедно со министерот за финансии, Хекуран Мурати и претседателот на собраниската Комисија за буџет и финансии, Арменд Муја, ќе разговара со претставниците на ОВВ ОВК, кои протестираат со барање ветераните да бидат опфатени во законот за минимална плата кој го предлага Владата и кој пред неколку дена доби начелна согласност од мнозинството пратеници од владејачките партии.

Тој побара од опозицијата, која ја блокира собраниската говорница и не дозволува седницата да продолжи додека не се прифатат барањата на ветераните, да овозможи продолжување на работата на Собранието, затоа што, како што рече, има многу други значајни точки кои треба да се усвојат.

Пред почетокот на денешната седница припадници на ОВВ ОВК се собраа на протест пред Собранието. По краток судир со полициските сили, но без посериозни инциденти, демонстрантите влегоа во собранискиот двор, каде што им се придружија пратениците на најголемата опозициска партија, Демократската партија на Косово (ПДК).

Ветераните на Косово на протест поради Законот за минимална плата

Протестот на воените ветерани пред Собранието продолжува и попладнево, а главно барање им е владиниот предлог за минимална плата во државата целосно да се симне од дневен ред.

Во Охрид утре ќе се одржи годинешниот Преспа форум, чија тема е „Градењето на иднината на Западниот Балкан во современата европска безбедносна архитектура“.

Своето присуство на Форумот го најавија голем број претставници од регионот и претставници на европски институции, невладини организации, академската заедница, меѓународни организации и други.