Нема вина за неспроведувањето на Мијалков на суд, утврди Управата за извршување на санкциите

Управата за извршување на санкции утврдила дека по грешка вчера поранешниот шеф на тајната полиција Сашо Мијалков не беше спроведен во Основниот кривичен суд во Скопје, на главна расправа по кривичниот предмет „Титаник 2”.

Тие денеска извршиле вонреден надзор во Казнено поправниот дом во Струга, каде воочиле дека се работи за превид, односно Кривичниот суд побарал спровод на Мијалков на погрешен датум за судењето.

„Во текот на надзорот се утврди дека од Основниот кривичен суд Скопје на ден 14.12.2022 година во КПД Струга е добиено барање заведено под V КОК.бр.7/20 со датум од 23.11.2022 година со кое судот побарал обвинетиот во предметот С.М да биде спроведен на расправа на ден 12.12.2022 година во 10 часот. Барањето во затворот е заведено со приемен печат на 14.12.2022 година“, велат од Управата.

Со оглед дека се утврдило дека овој акт е ист со претходно доставениот за расправата која била на 23.11.2022 година закажана за 12.12.2022 година, заклучено е, како што велат од Управата за извршување на санкциите, дека веројатно се работи за грешка, особено поради фактот што ни Судот не ја воочил грешката и не доставил исправка на овој акт.

Оттаму додаваат и дека КПД Струга претходно постапувал уредно на сите судски барања, а во овој случај не се работи за погрешно постапување, туку за превид на судските служби. Сметаат дека нема одговорност кај било кој вработен во КПД Струга и уверуваат дека Мијалков ќе биде спроведен навремено на рочиштето во понеделник.

Кривичниот суд во 2019 го осуди поранешниот директор на УБК, Сашо Мијалков за примање награда за противзаконито влијание.