Чекајќи го лекот, почина еден од пациентите со цистична фиброза

Најтешко болниот пациент од реткото заболување цистична фиброза, Благојче Илиевски починал. Веста ја потврдија од Здружението за цистична фиброза. Илиевски беше дел од Асоцијацијата која се бори за државата да го набави лекот „Трикафта“.

„Згасна еден живот- згасна еден свет! Асоцијацијата за цистична фиброза со преголема тага и скршеност известува дека денеска изгуби еден свој соборец, кој до последен здив веруваше дека ќе ја дочека новата терапија со Трикафта, надеж која заедно со него ја крепевме со последните атоми, стотина пациенти во државата, главно деца и млади со ЦФ. Заради ова, нашиот револт, огорченост и потресеност се исклучително големи, особено затоа што како АЦФ лекот го бараме од 2020 година и апелиравме постојано за итноста од воведување современа модулаторна терапија“ , објавија од Асоцијацијата на цистична фиброза.

Заради ова, додаваат од Асоцијацијата, револтот и огорченоста се исклучително големи, особено затоа што како Асоцијација лекот го бараат уште од 2020 година и апелираат постојано за итноста од воведување современа модулаторна терапија.

Пациентите во саботата излегоа на протест пред владата, разочарани од изјавата на министерот за здравство Беким Сали дека современиот лек ќе биде обезбеден прво за осум, а до крајот на годинава за триесет пациенти кои се во потешка состојба, но без да прецизира кога лекот ќе стигне до пациентите.

Според статистичките податоци во земјава има околу 130 пациенти со цистична фиброза.