هېواد: حکومت د سولې پروسې ته ژمن دی

کابل چاپ ورځپاڼو په خپلو نننیو ګڼو کې تر ډېره په قطر کې د سولې کېدونکي بین الافغاني خبرو اترو د ځنډېدو په اړه لیکنې او تبصرې کړې دي.



هشت صبح


هشت صبح ورځپاڼې په خپله سر مقاله کې، په دوحه کې د سولې خبرو اترو د ځنډېدو په تړاو خپله سرمقاله ځانګړې کړې ده.


وړاندې په سر مقاله کې راغلي، د خبرو د ځنډېدو یو لامل په ظاهره کې تخنیکي ستونزې یادې شوي خو د سرمقاله لیکونکي په خبره، چې یو شمېر طالب چارواکي د سفر کافي اسناد او مدارک نه لرل نو ځکه دا خبرې وځنډېدې.


ورځپاڼه لیکي، چې اوس د سولې د خبرو د پیل لپاره هېڅ ډول پلمه نه ده پاتې او که چېرې طالبان بیاهم د خبرو له پیل انکار کوي دا ثابتوي چې طالبان د خبرو واک او اختیار نه لري.



هېواد


هېواد دولتي ورځپاڼې بیا په خپله سر مقاله کې لیکلي، د سولې لپاره د خورا خطرناکو زندانيانو په ازادولو سره حکومت وښوده چې دې پروسې ته ژمن دی.


هېواد هم ټینګار کړی، چې نور نو طالب ډلې او نورو سياسي مخالفينو ته هېڅ کومه پلمه نه ده پاتې چې هغوی دې بيا هم د سولې د خبرو وخت وځنډوي او يا دې له دې لړۍ په شا شي.


وړاندې دا ډاډ هم ورکړل شوی چې د سولې لپاره يوازې او يوازې خبرې کېږي او پر نظام او ملي ګټو په کې معامله په هېڅ توګه د منلو نه ده.


ورځپاڼې دغه شان لیکلي ، چې دا خبره ځکه مطرح کوي چې د افغانستان نظام، د افغانستان اسلامي جمهوري نظام دی او دا نظام بايد پياوړی شي ځکه دا د ولس په رايو رامنځته شوی او نړيواله ټولنه يې ملاتړې ده.


سرمقاله کې ټينګار شوی چې د بل د ګټو لپاره د سولې په بدل کې پر نظام او ملي ګټو معامله په هېڅ توګه ملت ته د منلو او زغملو نه ده او دا ځکه چې نور نظامونه دا ملت سره يو موټی نه شي ساتلی.


لیکوال، طالب ډله د افغانستان يوه برخه بللې او لیکلي، هغوی هم په اوسني نظام کې حق لري چې راګډ شي او وبه کتل شې چې د ملت او هېواد لپاره څه کولی شي.



ویسا


ویسا ورځپاڼې په مذاکراتو کې د ځينو مهمو ټکو په پام کې نیولو ټینګار کړی.


ورځپاڼې لیکلي، دواړه مذاکراتي پلاوي باید د افغانانو هېلې او تېرې ناخوالې په نظر کې نیولو سره د ملي ګټو پر بنسټ خپلواکه پرېکړه وکړي.


بله مسئله چې ورځپاڼې پرې ټينګار کړی هغه د دې پروسې مدیریت دی.


ورځپاڼې لیکلي، د خبرو اخوا دواړه لوري باید متوجه واوسي چې د سولې له راوستلو او د سولې موافقې وروسته مرحله مدیریت کول ډېره مهمه او نازکه مرحله ده.


سرمقاله لیکوونکي دغه شان اندېښنه ښودلې، چې په دغه پړاو کې کېدای شي د بهرنیانو په لمسون په طالبانو کې ناراضي او د جګړې د دوام غوښتونکي ګروپونه سر اوچت کړي چې دا بهیر به له ننګونو سره مخ کړي.