پومپیو: په قطر کې د افغانانو ترمنځ خبرې تاریخي، خو ستونزمنې دي
د امریکا د بهرنیو چارو وزیر په قطر کې د افغانانو ترمنځ خبرې تاریخي، خو په ورته وخت کې "ستونزمنې" یادې کړې.
مایک پومپیو دوحې ته د سفر پر مهال په الوتکه کې خبریالانو ته وویل چې سبا په دې خبرو کې ګډون کوي.
ښاغلی پومپیو زیاتوي: "تمه لرو چې د شنبې په سهار، په دوو لسیزو کې د لومړي ځل لپاره افغانان د خبرو د مېز تر شا ووینو، د دوی خبرې به چې څنګه د هېواد چارې مخته بوځي، ممکن سختې وي."
د افغانستان د پخلاینې عالي شورا ویلي، افغان پلاوی نن دوحې ته رسېږي.
طالبانو هم له خپله اړخه د خبرو پيل ته چمتووالی اعلان کړی دی.
د امریکا د بهرنیو چارو وزارت ویلي، ترلاسه شوی فرصت باید له لاسه ونهوځي.
د طالبانو د قطر دفتر ویاند محمد نعیم وردک ویلي، د دوی هغه شپږ تنه زندانیان چې پر خوشې کېدو یې فرانسې او استرالیا نیوکې درلودې، دوحې ته رسېدلي دي.