د هرات زندان کې د شخړې له امله د وژل شویو شمېر ۸ ته ورسېد
د هرات د عامې روغتیا ریاست ویاند محمد شفیق شېرزي ازادي راډیو ته وویل، دا هغه وژل شوي دي چې جسدونهیې حوزوي روغتون ته لېږدول شوي دي.
ښاغلی شېرزی زیاتوي: "روغتون ته د یوه زنداني مرمۍ خوړولی جسد راوړل شوی او ۷ نور زندانیان په نا معلوم دلیل مړه شوي دي، په ټوله کې له پېښې ۸ جسدونه او ۱۲ ټپیان د هرات حوزوي روغتون ته لېږدول شوي دي."
شېرزی وایي، ټپيانو کې څلور امنیتي ځواکونه هم شامل دي.
دغه زندان کې تېر ماښام د زندانیانو اعتراض پیل شو چې تر نیمې شپې یې دوام درلود.
د اعتراض پر مهال د ډزو غږونه هم اورېدل شوي دي.
تر اوسه د اعتراض او رامنځته شوې شخړې اصلي لامل نهدی معلوم، خو د هرات د والي ویاند جیلاني فرهاد وايي، پولیس او زندانیان هغه مهال سره ونښتل چې زندانیانو د یوه دولتي پلاوي له پلټنې وروسته د زندان یوې برخې ته اور واچاوه.
فرهاد وایي، پولیسو د زندانیانو د ارامولو لپاره هوایي ډزې کړي، خو ډېر جزئیاتیې ورنهکړل.
د هرات په زندان کې څه باندې دوهنیم زره کسان چې بېلابېل جرمونه لري، بندیان دي.