د خامنه اي په ويبپاڼه د ډونالډ ټرمپ ته ورته د يو سړي عکس خپور شوى
په دې عکس کې دا سړی په ګلف لوبه بوخت ښکاري، چې یوې بې پېلوټه الوتکې په نښه کړی دی.
دا ظاهراً د ایراني جنرال قاسم سلیماني د وژنې په تړاو د غچ اخیستو د ګواښ پیغام ورکوي.
د خامنه اي د ویبپاڼې په یادښت کې راغلي: "قاتلان او د قتلونو امر ورکوونکي باید پوه شي، غچ چې هره شېبه ممکن دی."
دا عکس د اول وار لپاره د ټویټر په یوه فارسي پیغام کې خپور شو، چې د خامنه اي د ویبپاڼې لینک هم ورسره مل و، خو ټویټر پرون دغه مطلب وتاړه او ویې ویل دا حساب جعلي و.
د تهران او واشنګټن ترمنځ کړکېچ وروسته له هغې زیات شو، چې ډونالډ ټرمپ درې کاله مخکې له اټومي تړون څخه د وتلو او پر ایران بېرته د بندیزونو لګولو اعلان وکړ.