پوتزل: طالبان دې د نجونو او ښځو پر زدهکړو او کار محدوديت لهمنځه يوسي
یوناما پر خپله ټویټرپاڼه لیکلي چې پوتزل دا خبره پرون چهارشنبه د طالبانو د رئیس الوزرا له مرستیال مولوي عبدالکبیر سره په کتنه کې کړې ده.
په ورته وخت کې د طالبانو ویاند ذبیحالله مجاهد په یوه ټویټ کې ویلي، حکومت یې دیني او عصري زدهکړې د هر افغان حق ګڼي او دوی یې د مناسب چاپیریال په رامنځته کېدو بوخت دي.
مجاهد دغه چاپیریال د اسلام او افغاني فرهنګ چوکاټ بللی دی.
طالبانو له تېرو ۱۶ میاشتو راهیسې له شپږم ټولګي پورته د نجونو ښونځي بند کړي او تېره میاشت یې د نجونو لوړې زدهکړې هم تر دویم اعلان پورې وځنډولې.
طالبانو تېره میاشت په نادولتي موسسو کې د ښځو کارکول هم منعه اعلان کړل چې پراخ نړیوال غبرګونونه یې وپارول او غبرګون کې یې یو شمېر موسسو خپل کارونه وځنډول.