د ملګرو ملتونو د امنیت شورا پرېکړه: طالبان دې پر ښځو لګول شوي محدودیتونه لرې کړي
د ملګرو ملتونو د امنیت شورا د رایو په قاطع اکثریت پر افغانستان له واکمنو طالبانو وغوښتل چې پر نجونو او ښځو لګېدلي محدودیتونه چې ظالمانه بلل شوي دي، لیرې کړي.
په هغه ګډه اعلامیه کې چې د ملګرو ملتونو د امنیت شورا یوولسو غړو بېګا خپره کړه ویل شوي دي چې د خیریه موسسو ښځینه کارکوونکې، د افغانستان د روان ناوړه وضعیت لپاره ډېرې مهمې دي ځکه د افغان ښځو او نجونو لپاره د ژوند ژغورنې هغه اساسي خدمات وړاندې کوي چې نارینه یې نه شي کولای.
په ملګروملتونو کې د جاپان سفیر کیمي هیرو ایشیکان د امنیت شورا اعلامیه هغو خبریالانو ته واوروله چې د دې هېوادونو د ديپلوماتانو پر شاوخوا راټول شوي وو.
جاپان اوسمهال د ملګرو ملتونو د امنیت شورا دوره يي مشري کوي.
دې اعلامیې ته د امنیت شورا دایمي غړو، متحدوایالتونو، بریتانیا او فرانسې او دوره یي غړو البانیا، برازیل، اکوادور، ګابن، مالتا، سویس متحده عربي اماراتو او جاپان مثبتې رایې ورکړې.
خو د امنیت شورا دوو دایمي غړو روسیې او چین او دوو دوره یي غړو موزمبیق او ګانا منفي رایې ورکړې.
په اعلامیه کې د بشري مرستو په رسوونکو موسسو کې جنسیت ته له پام پرته د کارکوونکو د کار پر وړاندې د خنډونو د له منځه وړلو پر اړتیا ټینګار شوی.
په ملګرو ملتونو کې د بریتانیا سفیرې باربارا ووډ وارډ پر ټویټر په یوه بیان کې ویلي دي چې د پنجشنبې تر ورځې په سلو کې شاوخوا پنځلسو غیرحکومتي موسسو د طالبانو د وروستۍ پرېکړې په غبرګون کې په افغانستان کې خپل فعالیت بند کړی او د بشري مرستو په رسولو کې په سلو کې ۶۸ کمښت راغلی چې د هغې په وینا د پام وړ دی.
مېرمن ووډوارډ زیاتوي چې د ښځو له ګډون پرته د بشري مرستو د رسولو چارې امکان نه لري.
په بېګانۍ اعلامیه کې، په افغانستان کې د طالبانو له خوا د نجونو پر زده کړو او کار او همداراز د ښځو پر فردي آزادیو او د وګړو پر بشري حقونو د لګېدلو محدودیتونو د سمدستي لیرې کېدو غوښتنه هم شوې.
د ملګرو ملتونو امنیت شورا پنځه دایمي او لس دوره یي غړي لري.