د اوکراین د پخواني ولسمشر سلاکار په هسپانیه کې په ډزو ووژل شو
د راپورونو له مخې، د اوکراین د پخواني روسي پلوه ولسمشر ویکتور یانوکوویچ سلاکار اندرې پورتنوف د می په ۲۱مه له مادریده دباندي وروسته له هغه ووژل شو چې خپل کوچنیان یې ښوونځي ته پریښودل.
د هسپانیا د ملي پولیسو یوې سرچینې د ازادي راډيو اوکرایني څانګې ته تایید کړې چې دغه ۵۲ کلن کس چې له ۲۰۱۰ څخه تر ۲۰۱۴ پورې د اوکراین د ولسمشرۍ دفتر د مرستیال مشر په توګه دنده ترسره کړې وه، په ډزو ووژل شو.
د پولیسو ویاند ویلي: "رسمي سرچینې تاییدوي چې قرباني موټر ته د ختو په حال کې و. څو کسانو هغه پر شا او سر وویشت او له صحنې ځنګلي سیمې ته وتښتید."
د اوکراین دفاع وزارت د استخباراتو د ریاست یوې سرچینې هم د ازادي راډیو ځايي څانګې ته د پورتنوف مړینه تایید کړې ده.
پورتنوف د یانوکوویچ یو لوړ پوړی مرستیال و، چې له اروپایي اتحادیې سره د اوکراین د ملګرتیا تړون له لاسلیک کولو یې لاس واخیست. دا هغه اقدام و چې په ۲۰۱۳-۲۰۱۴ کلونو کې د اروپايي اتحادیې د تړون د لغوه کولو او د حکومت د لوړې کچې فساد پر وړاندې د یورو میدان خونړي لاریونونه یې راوپارول.
پورتنوف، چې له ۲۰۲۱ کال راهیسې د فساد په تور د امریکا تر محدودیتونو سره مخامخ و، په ۲۰۱۴ کال کې له اوکراینه، روسیې ته وتښتید او بیا اتریش ته لاړ. دا معلومه نه ده چې کله هغه هسپانیې ته کډه شو.
یو کال مخکې د اوکراین امنیتي خدماتو ادارې د روسیې لخوا د کریمیا ټاپووزمې د غیرقانوني الحاق په پېښه کې د لاس درلودو په تور هغه تر پوښتنو لاندي کړ او تحقیق يې ورڅخه پيل کړ.
دغه جنايي قضیه په ۲۰۱۹ کال کې وتړل شوه.