د پېښور پوهنتون زدکوونکو د خپلو ۲ ورکو ملګرو موندلو لپاره پرلت وهلی دی

د پېښور پوهنتون زدکوونکو د خپلو دوو بې درکه ملګرو د موندلو لپاره له یوې اونۍ راهیسې پرلت وهلی دی. دوی وايي، د محمد عدنان وزیر او خبیب وزیر تر پیدا کېدو پورې احتجاج ته دوام ورکوي. هغه زدکوونکي د پښتون ژغورنې غورځنګ (پي ټي اېم) فعالان هم دي چې د غورځنګ د مرکزي کمېټۍ له دوو غړو حنیف پشتین او نور الله ترین او درې نورو فعالانو سره یوځای د نومبر پر ۱۲مه په پېښور کې د خيبر پښتونخوا حکومت په کوربه توب له "امن جرګې" څخه تر وتلو وروسته ځینو کسانو ونیول او له هغه وخت راهیسې یې درک نه لګي. د پي ټي اېم مشر منظور پشتین د نومبر پر ۱۳مه په بیان کې تور پورې کړی وو چې پولیسو او د استخباراتي ادارو کارکوونکو یې د غورځنګ د پلاوي غړي "تر تشدد وروسته تښتولي" دي. پولیسو او استخباراتي او امنیتي ادارو لا د دې تور په غبرګون کې څه نه دي ویلي، خو د خیبر پښتونخوا اعلاوزیر سهېل اپرېدي د ډېسېمبر پر ۲۱مه وویل چې د هغوی د خوشې کولو په اړه یې له ځینو امنیتي ادارو سره خبرې کړې دي، خو لا یې په ازادولو نه دی توانېدلی. داراز، پېښور های کورټ هم روانه میاشت د پولیسو صوبايي مشر ته د هغوۍ د بې درکه کولو د تحقیقاتو او موندلو لپاره د ګډې پلټنیزې ډلې (جواینټ انوېسټيګېشن ټیم یا جې ای ټي) جوړولو امر کړی وو. د زدکوونکو د احتجاج په اړه ویډیويي رپورټ وګورئ.