Pompeo shpreh mbështetjen e palëkundur amerikane për Ukrainën

Sekretari amerikan i Shtetit, Mike Pompeo do të takohet me presidentin e Ukrainës, Volodymyr Zelenskiy, dhe zyrtarë të tjerë të lartë ukrainasë në Kiev, më 31 janar. 

Uashingtoni po tregon mbështetjen e tij për Ukrainën, e cila po lufton forcat e mbështetura nga Rusia, në një luftë vdekjeprurëse në rajonet e saj lindore të Donetskit dhe Luhanskit.

"Mbështetja e SHBA-së për Ukrainën është e palëkundur dhe unë synoj ta nënvizoj këtë pasi takohem me drejtuesit e qeverisë ukrainase, për të diskutuar mënyrat se si ne mund të çojmë përpara partneritetin tonë strategjik dhe të forcojmë pozicionin e Ukrainës si një shtet i lirë dhe demokratik", shkroi në rrjetin social Twitter, sekretari Pompeo. 

Vizita e Pompeos vjen në kohën kur Senati i Shteteve të Bashkuara po gjykon presidentin Donald Trump, i cili është akuzuar nga demokratët për abuzim të pushtetit, duke i bërë presion Ukrainës për të hetuar një rival të tij politik.

Ukraina mbështetet shumë në ndihmën ushtarake dhe politike të SHBA-së.

Më shumë se 13.000 njerëz janë vrarë në konflikt që nga prilli i vitit 2014. 

Rusia aneksoi Gadishullin e Krimesë të Ukrainës. në mars të vitit 2014, një veprim që nxiti reagim të ashpër nga bashkësia ndërkombëtare.

"Krimea është pjesë e Ukrainës dhe ne kurrë nuk do ta njohim përpjekjen e Rusisë për ta aneksuar atë", thuhet në deklaratën e Departamentit të Shtetit.

Pompeo, i cili filloi turneun e tij rajonal në Londër, do të udhëtojë gjithashtu në Bjellorusi, Kazakistan dhe Uzbekistan.