Ushtria akuzon Aung San Suu Kyinë për pranim të paligjshëm të parave dhe arit

Udhëheqësit ushtarakë të Mianmarit kanë akuzuar lideren e rrëzuar nga pushteti Aung San Suu Kyi për pranim të 600,000 dollarëve dhe arit, në mënyrë të paligjshme.

Ky pretendim është më i fuqishmi nga niveli ushtarak, prej puçit ushtarak të 1 shkurtit.

Ushtria ende nuk ka ofruar prova për këtë akuzë.

Gjenerali Zaw Min Tun ka akuzuar edhe presidentin Win Myint dhe disa ministra tjerë të kabinetit për korrupsion.

Partia e Suu Kyisë, Liga Kombëtare për Demokraci, ka fituar me shumicë votash zgjedhjet e vitit të kaluar, mirëpo ushtria tani beson se procesi është manipuluar.

Vëzhguesit e pavarur ndërkombëtarë kanë hedhur poshtë pretendimet e ushtrisë – duke thënë se nuk janë vërejtur parregullsi.

Suu Kyi është duke u mbajtur tash e pesë javë në një lokacion të panjohur dhe përballet me disa akuza, përfshirë nxitje “të frikës dhe alarmit”, përdorimit joligjor të radio-lidhjeve dhe shkeljes së kufizimeve për luftim të koronavirusit.

Mianmari është duke u përballur me protesta në rrugë, prej kur ushtria ka marrë kontrollin dhe ka ndaluar Suu Kyinë.

Të paktën shtatë  persona janë vrarë nga forcat e sigurisë të enjten, duke e çuar në më shumë se 60, numrin total të viktimave prej kur kanë nisur protestat.

Disa dëshmitarë kanë thënë se protestuesit janë qëlluar në kokë me armë zjarri.