Një viktimë dhe 21 raste të reja me koronavirus në Kosovë
Një viktimë dhe 21 raste të reja me koronavirus u konfirmuan të mërkurën në Kosovë.
Në raportin e saj ditor, Ministria e Shëndetësisë tha se rastet e reja pozitive rezultuan nga testimi i 1,893 mostrave.
Në 24-orëshin paraprak u shëruan 16 pacientë, ndërsa raste aktive me koronavirus mbeten 445.
Kosova, në total, ka konfirmuar mbi 160,000 raste të të infektuarve dhe 2,978 viktima.
Fushata e vaksinimit ka nisur në fund të marsit dhe deri të martën janë vaksinuar plotësisht mbi 733,000 qytetarë.
Një ditë më herët, Ministria e Shëndetësisë e Kosovës ka miratuar edhe vaksinimin e fëmijëve të moshës 12 deri në 15 vjeç.
Deri më tash, të gjithë personat mbi 16 vjeç kanë mundur të vaksinohen.
Vaksinat që jepen në Kosovë janë: Pfizer/BioNTech dhe AstraZeneca.