Shefat e inteligjencës amerikane dhe ruse diskutojnë për luftën kundër terrorizmit
Drejtori i Agjencisë Qendrore të Inteligjencës (CIA), William Burns, ka zhvilluar bisedime në Moskë me shefin e Shërbimit të Inteligjencës së Jashtme të Rusisë (SVR) Sergei Naryshkin. Ata diskutuan për bashkëpunimin dypalësh në luftën kundër terrorizmit ndërkombëtar.
Kreu i CIA-s ndodhet në Rusi në kohën kur tensionet mes dy vendeve janë në rritje.
Shërbimi i Inteligjencës ruse tha përmes një deklarate se “fokusi i bisedimeve ishte ndërveprimi në kontekstin e raporteve mes dy vendeve me theks të veçantë luftën kundër terrorizmit ndërkombëtar”.
Një ditë më parë, Burns dhe Nikolai Patrushev, udhëheqës i Këshillit të Sigurisë së Rusisë, “kanë diskutuar marrëdhëniet Rusi-SHBA”, është thënë në një komunikatë për media të këtij Këshilli më 2 nëntor.
Marrëdhëniet e Rusisë me Shtetet e Bashkuara janë në nivelet më të ulëta prej periudhës pas Luftës së Ftohtë, kryesisht për shkak të ndërhyrjes së Rusisë në zgjedhjet amerikane, aneksimin e Gadishullit ukrainas të Krimesë nga Moska, konfliktet në lindje të Ukrainës, sulmet kibernetike që dyshohet se i kanë kryer hakerët rusë dhe helmimin e kritikut të Kremlinit, Aleksei Navalny.
Biden, ka thënë se pavarësisht tensioneve, administrata e tij synon gjetjen e mënyrave të bashkëpunimit me Moskën për çështje specifike, siç janë zvogëlimi i armëve strategjike, bisedimet me Iranin për armë bërthamore dhe luftimin e sulmeve kibernetike.