Боздошти пешвои бонуфузи курдҳо дар Чехия
Мақомоти Чехия яке аз пешвоёни бонуфузи курдҳои Сурияро бо дархости ҳукумати Туркия дастгир кардаанд. Хабаргузории расмии Туркия ва ТЕВ ДЕМ, як эътилофи сиёсии курдҳо рӯзи 25-уми феврал гуфтанд, ки Солеҳ Муслим, ҳамраиси Ҳизби Воҳиди Демократии Курдҳо рӯзи 24-уми феврал дар шаҳри Прага дастгир шудааст.
Мақомоти Чехия ҳанӯз масъалаи боздошти Солеҳ Муслимро, ки шаҳрванди Сурия аст, шарҳ надодаанд. ТЕВ-ДЕМ гуфтааст, ки Туркия дархости боздошти Солеҳ Муслимро содир кардааст ва боздошти ӯ ҳам «амали ғайриқонунӣ» аст.
Туркия Ҳизби Воҳиди Демократии Курдҳоро, ки нерӯи асосии сиёсии курдҳои Сурия аст, созмони террористӣ мешуморад. Ҳоло маълум нест, Солеҳ Муслимро ба Туркия месупоранд, ё не, чун қарори ниҳоӣ дар дасти додгоҳҳои Чехия аст.