СММ мегӯяд, Толибон асиронашонро мекушанду шиканҷа мекунанд
Дафтари Созмони Милал дар Афғонистон мегӯяд, Толибон бо афғонҳое, ки асир мегиранд, бадрафторӣ мекунанд ва ин чунин амалкарди онҳо баробар бо шиканҷаи маҳбусон аст.
Дар як баёнияи расмии созмон, ки рӯзи 26-уми май нашр шуд, омадааст, намояндагони СММ бо 13 асири гуруҳи 53 нафарие Толибон, гуфтӯгу кардаанд, ки маъмурони амниятии Афғонистон онҳоро моҳи гузашта аз як боздоштгоҳи Толибон дар вилояти Урузгон озод карданд.
Аксарияти онҳое, ки рӯзи 25-уми май озод шуданд, сарбозон, маъмурони амният, мақомоти расмӣ ва ғайринизомиён будаанд. Дар баёния омадааст, ба истиснои се нафар, ки аз соли 2016 дар асорати Толибон будаанд, бақияро аз соли 2018 дар ин зиндон нигаҳ медоштанд.
Ба гуфтаи Созмони Милал, шароит дар ин зиндон бисёр бад будааст ва бандиёнро маҷбуран кор мефармудаанд. Дафтари Созмони Милал аз қавли маҳбусони раҳошуда навиштааст, ки Толибон баъзе аз бандиёнро куштаанд. Дар баёния омадааст, тасвири маҳбусон аз зиндон воқеӣ аст ва онҳо дар бораи шиканҷаву бадрафторӣ ва дасти кам қатли 11 бандӣ аз тарафи Толибон нақл кардаанд.