Дар Беларус ду журналист то 20-рӯзӣ ҳабс шуданд
Дар Беларус ду гузоришгар, аз ҷумла як хабарнигори расонаи олмонии Deutsche Welle бо иттиҳоми гӯё ширкат кардани онҳо дар намоишҳои эътирозии ғайриқонунӣ ба мӯҳлати то 20-рӯзӣ ҳабс шуданд. Ҳукме, ки 15-уми май содир шуд, яке аз даҳҳо қазиҳои додгоҳӣ дар Беларус алайҳи журналистон аст. Баъди интихоботи баҳсбарангези президентии августи порсол ва эътирозҳои сартосарӣ дар Беларус мақомот аз шеваи саркӯбҳои шадид кор гирифта, аз ҷумла журналистонро ҳам, ки дар пӯшиши хабарии ин таҳаввулот кор мекарданд, ба ҷавобгарӣ кашиданд.
Хабарнигори Deutsche Welle Александр Буряков ва журналисти мустақил Владимир Лаптсевич рӯзи 12 май дар шаҳри Могилёв боздошт шуданд. Дар ин шаҳри воқеъ дар 200-километрии шарқи Минск ин ду журналист бо пӯшиши хабарии додгоҳи Певел Северинетс, як сиёсатмадори мухолифи ҳукумати Александр Лукашенко машғул буданд. Полиси Беларус дар далели боздошти онҳо гуфт, ки ин журналистон “такроран дар намоишҳои эътирозии ғайриқонунии соли ҷорӣ иштирок карданд”. Вале гурӯҳи ҳомии ҳуқуқи MayDay гуфт, ки рӯзи 12 май дар муқобили додгоҳи шаҳри Могилёв ҳеҷ намоиши эътирозӣ баргузор нашудааст. Раҳбари кулли Deutsche Welle Питер Лимбург аз мақомоти Беларус озодии билофосилаи журналистонро тақозо кард.