Агентӣ гуфт, дар Тоҷикистон соли 2022 аз қочоқи беш аз 4 тонна нашъа пешгирӣ шуд
Мақомот гуфтанд, сохторҳои ҳифзи қонун дар Тоҷикистон соли 2022 аз муомилоти ғайриқонунӣ беш аз 4 тонна маводи нашъаоварро мусодира кардаанд, ки дар қиёс бо соли 2021 ду дарсад камтар мебошад. Ин омор рӯзи 3-юми феврал дар нишасти матбуотии раҳбарияти Агентии назорати маводи нашъаовари назди президенти Тоҷикистон садо дод. Ба навиштаи ин манбаъ, соли 2022 дар ҳудуди Тоҷикистон наздики 22,5 ҳазор ҷиноят ба қайд гирифта шудааст ва 688 ҳолаташ вобаста ба қочоқи маводи мухаддир мебошад.
Ҳукумат дар Душанбе мушкили парвариши нашъа дар Афғонистон ва қочоқи ин маводи ғайриқонунӣ ба Тоҷикистонро як чолиши ҷиддӣ барои амнияту суботи ин кишвар меномад, вале таҳлилгарон мегӯянд, вуҷуди тиҷорати сиёҳи маводи мухаддир бидуни омилҳои коррупсионӣ имкон надорад. Мақомот дар Тоҷикистон дар ҳолатҳои хеле кам дар бораи ошкор шудани гурӯҳҳои бонуфузи ҷиноии нашъаҷаллоб гузориш медиҳанд, ки аз ҳисоби муомилоти ғайриқонунии нашъа даромадҳои ҳангуфт ба даст меоранд.