КМВА ва "Регар-ТадАЗ" дар финали Ҷоми ФФТ-2023 бозӣ мекунанд
Дастаҳои КМВА (Клуби марказии варзишии артиш)-и Душанбе ва «Регар-ТадАЗ»-и Турсунзода ба финали Ҷоми ФФТ (Федератсияи футболи Тоҷикистон)-2023 роҳ ёфтанд.
Бозиҳои даври ниманиҳоии Ҷоми ФФТ-2023 рӯзи чоршанбеи 22-юми феврал дар Варзишгоҳи марказии шаҳри Ҳисор баргузор шуданд.
Дар бозии аввали нимфиналӣ КМВА бар дастаи «Панҷшер»-и ноҳияи Ҷалолиддини Балхӣ бо ҳисоби 2:1 пирӯз шуд. Бозии дигари ниманиҳоӣ миёни дастаҳои «Регар-ТадАЗ» ва «Равшан»-и Кӯлоб бо ғалабаи футболбозони шаҳри Турсунзода бо ҳисоби 5:3 хотима ёфт.
Ба ин тартиб, 25-уми феврал дастаҳои «Панҷшер» ва «Равшан» барои ҷойи сеюм мубориза мебаранд. Дар финал КМВА ва «Регар-ТадАЗ» бозӣ мекунанд.
Маблағи ҷоизаҳои Ҷоми ФФТ-2023 ҳамагӣ 100 ҳазор сомониро ташкил медиҳад. Ғолиби мусобиқа бо 50 000 сомонӣ, барандаи медали нуқра бо 30 ҳазор сомонӣ ва соҳиби медалҳои биринҷӣ бо 20 ҳазор сомонӣ мукофотонида мешаванд.
Ҷоми ФФТ (Федератсияи футболи Тоҷикистон)-2023
Даври ниманиҳоӣ
КМВА – «Панҷшер» – 2:1
Голҳо: Исроил Холов, 27 (1:0). Муҳаммад Ризомов, 47 (1:1). Мусиси Фароук, 77 (2:1).
Аз майдон хориҷ шуд: Абдулатиф Тоҷиаҳмадов («Панҷшер»), 90+2 – корти зарди 2-юм.
Беҳтарин бозигари дидор: Бахтиёр Чориев (КМВА).
«Регар-ТадАЗ» – «Равшан» – 5:3
Голҳо: Крис Эммануэл, 11 (0:1). Фирӯз Бобиев, 32 (1:1). Нуриддин Ҳамроқулов, 38 (2:1). Крис Эммануэл, 45+1 (2:2). Бахтовари Хуршед, 53 – ба дарвозаи худ (3:2). Фирӯз Бобиев, 57 (4:2). Фирӯз Қараев, 59 (5:2). Ҳасан Фараҳ, 69 – аз пеналти (5:3).
Беҳтарин бозигари дидор: Фирӯз Бобиев («Регар-ТадАЗ»).
Бозӣ барои ҷойи сеюм
25-уми феврал (шанбе)
Оғози бозӣ – соати 11:00
«Панҷшер» – «Равшан»
Ҳисор, Варзишгоҳи марказӣ
Финал
25-уми феврал (шанбе)
Оғози бозӣ – соати 15:00
КМВА – «Регар-ТадАЗ»
Ҳисор, Варзишгоҳи марказӣ