Siriýanyň goşuny Ysraýylyň raketa zarbalaryna sezewar bolandygyny aýdýar
Siriýanyň döwlet telewideniýesi arkaly edilen beýanatda howa hüjümleri “Ysraýylyň täze agressiýasy” hökmünde häsiýetlendirildi, emma jikme-jikler mälim edilmedi.
Bu habar bilen baglylykda Ysraýyl tarapyndan dessine kommentariý bolmady.
Siriýanyň prezidenti Başar al-Assadyň hökümeti Ysraýylyň hüjümi barada bir aýyň dowamynda ikinji gezek habar berýär.
9-njy ýanwarda Siriýanyň harbylary Ysraýyly Damaskyň golaýyndaky Kutayfeh giňişliginde harby nokadyny raketadan oka tutmakda aýyplady.
Ysraýyl Siriýada 7 ýyl bäri dowam edýän graždan urşunyň dowamynda bu ýurduň territoriýasynda howa zarbalarynyň ençemesini amala aşyrdy we hüjümleriniň Assadyň hökümet güýçleriniň tarapynda söweşýän Liwanyň “Hyzballa” söweşiji toparynyň üpjünçiligi bilen bagly bolmakda güman edilýän nyşanlara garşy gönükdirilýändigini aýtdy.