BMG: Owganystanda öldürilen parahat adamlaryň sany rekord derejelere ýetdi
Öldürilenleriň sany 1% köpelip, 1,692 adam boldy, ýaraly bolanlar 5% azalyp, 3,430 adam boldy diýip, BMG-niň Owganystandaky Kömek missiýasynyň parahat adamlaryň ölümi boýunça 15-nji iýulda çap eden soňky hasabatynda aýdylýar.
Owganystanda parahat adamlaryň öldürilmegini sistemalaýyn hasaba almak 2009-njy ýylda başlandy we, BMG-niň aýtmagyna görä, bu alty aýda öldürilen parahat adamlaryň iň kän görkezijisi bolup durýar.
Umuman alnanda, pidalaryň sany 3% kemeldi.
Hasabatda Kabul, Nangarhar, Farýab, Helmand we Kandahar welaýatlarynda ýaşaýan parahat adamlaryň has kän zorluk-sütem ähtimallygy bilen ýüzbe-ýüz bolýandygy aýdylýar.
Şaýy zyýarathanalaryna, hökümet binalaryna, kömek guramalarynyň ofislerine we saýlawçylary hasaba alýan merkezlere edilen hüjümlerde ýüzlerçe parahat adam öldürildi.