Jokrama yssyda Gurbanguly Berdimuhamedowyň doglan güni mejbury belledilýär
Türkmenistanyň öňki awtoritar prezidenti Gurbanguly Berdimuhamedowyň 29-njy iýundaky doglan gününe gabat, ýurduň dürli künjeklerinde mejbury aýdym-saz we medeni çäreleri geçirilýär. Mundan başga-da häkimiýetler, ýurduň agyr ykdysady çökgünlik bilen ýüzbe-ýüz bolup duran mahaly, ozalky ýyllaryň tejribelerine eýerip, daşary ýurtly bagşy-sazandalaryň konsertlerini hem gurnaýar.
Lebap welaýatynyň dolandyryş merkezi Türkmenabatda, 15 ýyllyk häkimiýeti döwründe adam hukuklaryny berk depelemekde tankytlanan, Gurbanguly Berdimuhamedowyň 65 ýaşynyň dolmagy mynasybetli, kanun goraýjy gulluklaryň işgärlerine, şol sanda ýol polisiýasyna baýramçylyk lybaslarynda, ýagny ak köýnekde işlemek buýruldy.
Mundan başga-da, türkmenabatly býujetçilere iş sagatlaryndan soň, şäheriň seýilgählerinde gurnaljak aýdym-saz konsertlerine hökmany gatnaşmalydygy tabşyryldy.
“Bu gün Türkmenabatda howanyň temperaturasynyň 46 gradusa çenli gyzmagyna garaşylýar. Bu jokrama yssyda daşary umuman çykar ýaly däl, günüň şöhleleri ‘beýniňi gaýnadyp’ gelýär. Emma muňa hem garamazdan, ýolbaşçylar seýilgählerde hökmany ‘şadyýan’ uly märekäniň bolmalydygyny aýdyp, ähli işgäriň işinden soň göni ‘Bitaraplyk’ seýilgähine barmalydygyny aýtdylar. Olar kimiň gelip-gelmändigi barada sanawyň ýörediljekdigini, gelmedikleriň hem işinden boşadyljakdygyny duýdurdylar” diýip, häkimligiň atlandyrylmasyzlygyny soran bir işgäri 29-njy iýunda irden gürrüň berdi.
Şeýle-de, ýerli bilim işgärlerine Türkmenabadyň ak öý binasynda günortan sagat 15:00-da geçirilýän aýdym-saz çäresine hökmany barmalydygy aýdyldy.
“Mugallymlara, beýleki býujetçiler bilen birlikde, ak öýüň oturgyçlaryny doldurmak tabşyryldy. Bu çärä gatnaşjaklaryň, seýilgählere gelmeli edilenlerden tapawutlylykda, hökmany milli lybaslarda bolmalydygy aýdyldy” diýip, ýerli mugallymlaryň biri 28-nji iýunda belledi.
Bu aralykda, hökümetçi ýarym-resmi neşirler 28-29-njy iýunda, uly Berdimuhamedowyň doglan gününe gabat, Änewdäki ak öý binasynda daşary ýurtly bagşy-sazandalaryň konsertleriniň guraljakdygyny yglan etdiler.
Maglumata görä, Änewde boljak konsertde Dr.Alban (Şwesiýa), Akon (Senegal), Demet Akalyn (Türkiýe), Amani Swissi (Tunis), Emin Agalarow (Azerbaýjan), «Artik&Asti» topary we beýlekiler çykyş eder.
Sözüň gerdişine bellesek, bu konsertler hazarýaka döwletleriniň baştutanlarynyň 29-njy iýunda, G.Berdimuhamedowyň 65 ýaşynyň dolýan gününde Aşgabatda geçirilýän Kaspi sammitine we Medeniýet hepdeliginiň soňky, jemleýji günlerine hem gabat geldi.
Şol bir wagtda, türkmen hökümeti ýurduň agyr ykdysady çökgünlik, azyk ýetmezçiligi bilen ýüzbe-ýüz bolýan mahaly, adatça bolşy ýaly, bu hili dabaralara çykarylýan maliýe serişdeleri barada asla maglumat bermeýär.
Mundan öňki ýyllarda Gurbanguly Berdimuhammedowyň doglan gününe gabat guralan dabaralaryň "iň göze ileni" 2013-nji ýylda bolupdy.
Şonda amerikan belli aýdymçysy Jenifer Lopeziň Berdimuhamedowy 56 ýaşynyň dolmagy mynasybetli çykyşy üçin 1,5 million dollar möçberinde pul gazanandygy aýdylypdy. Şol bir wagtda, Lopeziň Berdimuhamedowyň şanyna “Doglan günüňiz gutly bolsun, jenap prezident!” diýip hiňlenmegi adam hukuklaryny goraýjy aktiwstleriň gahar-gazabyny getiripdi.
Lopeziň türkmen lideriniň doglan gününde aýdym aýtmagy dünýä metbugatynda-da berk tankyda sezewar bolupdy. “Forbes” neşirinde “Jennifer Lopeziň söýgüsiniň bahasy bar, Türkmenistanyň diktatory üçin çykyş edýär” atly makala hem çap bolupdy.
Köp sanly tankytlaryň yzy bilen Jennifer Lopeziň wekili beýanat ýaýratdy, onda, hususanda, “eger-de [Türkmenistanda] adam hukuklary bilen bagly islendik mesele barada bilnen bolsady, Jennifer bu çärä gatnaşmazdy” diýip, bellenipdi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.