ABŞ Dagly-Garabagda zorlugyň bes edilmegine çagyrýar
Öz-özüni jar eden Dagly-Garabagyň lideri Araýik Arutýunýan 3-nji awgustda bölekleýin harby mobilizasiýa baradaky karara gol çekdi. Ykrar edilmedik "Dagly-Garabag respublikasynyň" başlygynyň karary sebitdäki ýagdaýyň ýitileşmeginiň fonunda ýüze çykdy diýip, Azatlyk radiosynyň Ermeni gullugynyň, “Azatutýun” radiosynyň habarynda aýdylýar.
Russiýanyň “Interfaks” habar gullugynyň ykrar edilmedik respublikanyň “Goranmak ministrligine” salgylanyp ýazmagyna görä, Azerbaýjanyň goşuny irden “minomýot, granat we pilotsyz uçar ulanyp, goranyş goşunynyň söweş nokatlaryna we harby bölümleriň biriniň hemişelik ýerleşýän ýerine zarba urdy”.
Bu zarbalar netijesinde iki harby gullukçynyň wepat bolandygy, 14 adamyň ýaralanandygy habar berilýär.
Azerbaýjanyň Goranmak ministrligi, öz gezeginde, 3-nji awgustda azerbaýjan goşunynyň berkitmelerine atylan oklardan bir esgeriň wepat bolandygyny aýtdy.
3-nji awgustda, iki tarapyň Dagly-Garabagdaky ýaraşygyň bozulmagynda bir-birini aýyplaýan wagtynda, Ermenistanyň Daşary işler ministrligi halkara jemgyýetçiligini “zerur bolan halkara mehanizmlerini ulanyp, Azerbaýjanyň agressiw hereketlerini we hokgalaryny çäklendirmäge gönükdirilen çäreleri işe girizmäge” çagyrdy.
Bu wakalar ÝB-niň daşary syýasat wekili Josep Borrelliň taraplary atyşygy derhal bes etmäge çagyrmagyna getirdi.
"Dagly-Garbag respublikasynyň goşuny” üçünji gün sagat 18:00-a çenli ýagdaýyň "birneme durnukly bolandygyny" aýtdy.
ABŞ-nyň Döwlet departamenti bölünip aýrylan Dagly-Garabag sebitinde zorlugyň möwjemegine alada bildirdi we dartgynlygy azaltmak we zorlugyň güýçlenmeginiň öňüni almak üçin gyssagly çäre görmäge çagyrdy.