Estoniýa sowet döwrüniň ýadygärliklerini köpçülik ýerlerinden aýyrýar

Estoniýanyň hökümeti sowet ýadygärliklerini jemgyýetçilik ýerlerinden aýyrmak kararyna geldi diýip, Russiýanyň "Kommersant" gazeti habar berýär. Ýurtda sowet döwründe gurlan ýadygärlikleriň 400-e golaýy saklanyp galdy.

“Ministrler kabinetiniň mejlisinde biz basyp alyjy häkimiýetiň nyşanlary bolan ýadygärlikleriň jemgyýetçilik ýerlerinden aýrylmagyna nähili çemeleşmelidigi barada anyk maslahat etdik. Esasy zat gyzyl ýadygärlikleriň köpçülik ýerlerinden aýrylmagy baradaky karara gelindi we biz indi bu işi mümkin boldugyça gysga wagt içinde ýerine ýetireris” diýip, Estoniýanyň premýer-ministri Kaýa Kallas aýtdy.

Ol gürrüňi edilýän ýadygärlikleriň ýurduň çar künjeginde ýerleşýändigini we ýerli häkimiýetlere degişlidigini, diýmek, olaryň söküljek wagtyny hem ýerli häkimiýetleriň kesgitlemelidigini aýtdy.

Kallas Russiýa bilen serhetleşýän Narwa şäherinde T-34 tankyna dikilen ýadygärlik barada aýratyn durup geçdi. Ýerli ýaşaýjylar, üýz töweregi adam onuň sökülmegine garşy çykdy. Şol bir wagtda, tanky sökmek barada resmi habar berilmändi. Netijede, şäher häkimi Katri Raýk muny “sosial ulgamlaryň prowokasiýasy” diýip häsiýetlendirdi.

Premýer-ministr tankyň Narwa degişlidigini, emma onuň başga ýere geçirilmegi meselesindäki jogapkärçiligiň eston hökümetine degişli bolmalydygyny, sebäbi bu ýadygärligiň "simwoliki manysynyň bardygyny", onuň aýrylmagynyň jemgyýetde dartgynlylyk döredip biljekdigini aýtdy.

Respublikanyň daşary işler ministri Urmas Reýnsalu tanky gysga wagtda sökmek üçin parlamentiň nobatdan daşary mejlisini çagyrmaly, bu onuň bir aý içinde sökülmegine mümkinçilik berer diýdi.