Polisiýa: Kabul metjidinde bolan partlamada 21 adam öldürildi
17-nji awgustda Owganystanyň paýtagty Kabulda bir metjitde namaz okamaga gelen adamlaryň arasynda bolan partlamada azyndan 21 adam öldi diýip, polisiýa resmileri aýtdy.
Polisiýanyň metbugat sekretary Halid Zadran 18-nji awgustda bu partlamada 33 adamyň ýaralanandygyny aýtdy.
Italiýanyň hökümetden aýry Adatdan daşary ýagdaý guramasynyň hassahanasy Kabulyň demirgazyk-günbatarynda bolan partlamada ýaralanan 27 adamy, şol sanda üç merhumy kabul edendigini aýtdy.
"Metjidiň içinde bolan partlamadan soň kabul eden hassalarymyzyň köpüsi bomba gyýçaklaryndan we ýanyk ýarasyndan ejir çekýär" diýip, hassahana E-poçta arkaly beren düşündirişinde aýtdy.
Hüjümiň jogapkärçiligini bada-bat öz üstüne alan bolmady, ýöne ABŞ-nyň ýolbaşçylygyndaky güýçleriň ýurtdan çekilmegi bilen, “Talyban” geçen ýylyň awgust aýynda häkimiýet başyna gaýdyp geleli bäri, “Yslam döwleti” toparçagynyň ýerli bölümi öz edýän hüjümlerini güýçlendirdi.
“Talybanyň” metbugat wekili Zabihullah Mujahid partlamada ölen we ýaralanan adamlaryň bolandygyny tassyklady, ýöne anyk san aýtmady.
Ady aýdylmadyk resmiler partlamada azyndan 10 adamyň ölendigini we 30 adamyň ýaralanandygyny aýtdylar.