Gyrgyz mekdeplerine "Dinleriň ösüş taryhy" atly okuw kitaplary berler
Täze okuw ýylynda gyrgyz mekdeplerine täze girizilýän ders boýunça "Dinleriň ösüş taryhy" atly okuw kitaplary gowşurylar diýip, Gyrgyzystanyň Bilim we ylym ministrliginiň metbugat gullugy “Azatlyk” radiosynyň Gyrgyz gullugyna aýtdy.
Resmileriň aýtmaklaryna görä, bu okuw kitaby häzir rus, özbek we täjik dillerine terjime edilýär. Bilim ministrliginiň maglumatyna görä, täze okuw kitaplaryny taýýarlamak işine ýedi adam gatnaşdy.
Prezident Sadyr Žaparow iýun aýynda respublikanyň mekdeplerinde "Dinleriň ösüş taryhy" atly täze dersiň girizilmegi baradaky karara gol çekdi.
Bu karara laýyklykda, eýeçiligiň görnüşlerine garamazdan, mekdepleriň ählisinde 9-njy synp okuwçylary üçin täze ders giriziler.