Lebabyň käbir hassahanalarynda saglyk hyzmatlarynyň tölegleri 10% gymmatlady
Türkmenistanda şu ýylyň 1-nji ýanwaryndan aýlyk haklary 10% ýokarlanan bolsa, Lebap welaýatynyň käbir hassahanalarynda we saglyk öýlerinde saglyk hyzmatlarynyň tölegleri hem şonça gymmatlady. Bu aralykda, lebaply näsaglaryň ençemesi sebitiň köp ugurly hassahanasynda "käbir medisina serişdeleriniň bikanun söwdasy we parahorluk wakalary" barada gürrüň berdi.
"Bu tölegler esasan hassahanada ýatyp bejergi alýan näsagalara degişli. Meselem, Lebap welaýatynyň köp ugurly hassahanasynda ýatyp bejergi aljak syrkaw öň azyndan 1250-1400 manat aralygynda töleg tölän bolsa, indi bu 1400-1600 manada ýetdi" diýip, Azatlyk Radiosynyň sebitdäki habarçysy aýtdy.
Munuň düzümine näsag üçin zerur bolan dermanlaryň, ertirlik, günortanlyk we agşamlyk naharlarynyň tölegleri girmeýär.
"Hassa dermanlaryň we sanjymlaryň ählisini özi satyn almaly bolýar. Ol iýjek naharyny-da ýa hassahanadan satyn almaly, ýa-da hossarlaryna öýden getirtmeli bolýar" diýip, ýakynda bu hassahanada bir hepde ýatyp, saglyk bejergisini alan bir türkmenabatly ýaşaýjy anonimlik şertinde habarçymyza gürrüň berdi.
Türkmenistanda 2023-nji ýylyň 1-nji ýanwaryndan başlap, býujetden maliýeleşdirilýän edaralaryň, hojalyk hasaplaşygyndaky kärhanalaryň we jemgyýetçilik birleşikleriniň işgärleriniň aýlyk zähmet haklarynyň; pensiýalaryň we döwlet kömek pullarynyň; talyp we diňleýji haklarynyň möçberleri 10 göterim ýokarlandyryldy.
Prezident Serdar Berdimuhamedow bu baradaky karara geçen ýylyň 8-nji iýulynda gol çekdi. Şonda bu karara ýurduň ilatynyň ýaşaýyş-durmuş şertlerini, durmuş taýdan goraglylygyny mundan beýläk-de ýokarlandyrmak maksady bilen gol çekilendigi aýdyldy, ýöne inflýasiýanyň derejesi agzalmady.
Lebaplylaryň ençemesi ýaşaýyş-durmuşyň 10% köpeldilýän aýlyklardan ençeme esse köp gymmatlaýandygyny aýdyp, munuň "gözboýagçylykdan başga zat däldigini" belleýär.
"Aýlyklar 10% köpeldilse, azyk we beýleki hyzmatlaryň bahasy 70-80%, käte ondan hem köp ýokarlanýar. Ilatyň gün-güzerany ýyl-ýyldan gowulaşman, gaýtam ýaramazlaşýar" diýip, türkmenabatly ýaşaýjy aýtdy.
Ýurtda "Zähmet haklaryny we beýleki kömek pullaryny 10 göterim ýokarlandyrmagyň” ýeterlikdigini Türkmenistanyň öňki prezidenti, häzir Halk Maslahatynyň başlygy Gurbanguly Berdimuhamedow hem sorag astyna alypdy. Geçen ýylyň noýabrynda eden çykyşynda ol 2023-nji ýylyň döwlet býujeti hakyndaky kanun taslamasyna gaýtadan seredilmelidigini hem aýdypdy.
Türkmen hökümeti ýurtda alty ýyl çemesi wagt bäri dowam edýän agyr ykdysady kynçylyklary, işsizligiň derejesini, bularyň ilata ýetirýän täsirlerini resmi taýdan boýun alman gelýär.
Bu aralykda, lebaply näsaglaryň ençemesi sebitiň köp ugurly hassahanasynda käbir medisina serişdeleriniň bikanun söwdasy we parahorluk wakalary barada habar berýär.
Olaryň sözlerine görä, bu hassahanada näsaglar döwlet tarapyndan mugt ýa ýeňillikli bahadan berilýän dermanlary we medisina serişdelerini satyn almaly bolýarlar.
"Hassahana işgärleri özaralarynda ylalaşyp, dermanlary we sanjymlary näsaglara satýarlar. Her bölümde uly şepagat uýasy bar. Olar näsaglaryň satyn almadyk dermanlaryny hassahananyň daşyndaky üçünji şahslara satýarlar. Uly şepagat uýalarynyň bu puly bölüm başlyklary bilen paýlaşýandygy aýdylýar. Ýöne näsagyň kitapçasyna dermanlaryň hassahana tarapyndan üpjün edilendigi ýazylýar" diýip, türkmenabatly ýaşaýjy aýtdy.
Galyberse-de, näsaglar hassahanada ýüregi operasiýa edýän lukmanlara resmi töleglerden başga-da, müňlerçe manat möçberinde para bermäge mejbur bolýandyklaryny hem aýdýarlar.
"Käte paranyň möçberi 16 müň manada çenli ýetýär. Hassahana durşuna bir parahorluk merkezi" diýip, türkmenabatly näsag belledi.
Azatlyk ýokarda beýan edilen ýagdaýlar barada Lebabyň köp ugurly hassahanasyndan resmi kommentariýa alyp bilmedi. Şeýle-de, söz azatlygy berk çäklendirilýän Türkmenistanda gürrüňi edilýän şepagat uýalary we lukmanlar bilen habarlaşmak hem başartmady.
Ýöne bellesek, Lebabyň käbir hassahanalarynda näsaglara berilmeli dermanlaryň "aşakdan üçünji şahslara satylýandygy" barada Azatlygyň habarçylary mundan ozal hem birnäçe gezek maglumat beripdiler. Şeýle-de, ýurtda mümkinçiligi çäkli adamlardan maýyplygyny tassyklatmak üçin soralýan para-berim barada hem ençeme maglumat gelip gowşupdy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.