Новости за 13.12.2022

15 декабрьдә Татарстан Республикасы Милли музеенда Петр I ассамблеялары тарихы темасына стенд күргәзмәсе ачылачак.

Күзләре күрмәүче Чаллы егете Рамил Гобәйдуллинга Росиядә әле моңарчы бер тапкыр да үткәрелмәгән операция ясадылар. Пациентның кулына Ашыгыч медицина ярдәме хастаханәсе хирурглары Илья Морогов һәм Марат Шәрәфетдинов гемодиализ шунты, ягъни ясалма кан тамыры протезы куйды. Бу хакта «Шәһри Чаллы» газетасы хәбәр итә.

Г. Тукай исемендәге үзәк балалар китапханәсендә Ватан Геройлары көне уңаеннан 5нче гимназия укучыларының Яшь армиячеләр сафына кабул ителү хәрби-патриотик чарасы узды. Бу чарада Әлмәт муниципаль районы башлыгы Тимур Нагуманов һәм Әлмәт шәһәре хәрби комиссары Ришат Сабиров катнашты. Бу хакта Әлмәт районы башлыгы матбугат хезмәтенә сылтама белән «Әлмәт таңнары» хәбәр итә.

Актаныш районында зур проект- «Игелек марафоны»на йомгак ясалды. Менә егерме өченче ел рәттән районда Халыкара инвалидлар көне гади истәлекле көн чикләрендә генә калмыйча киң масштабта уздырыла.

Азнакай үзәк китапханәсендә журналист, китаплар авторы Наил Абдуллинның иҗат кичәсе узды. Анда юбилярның каләмдәш дуслары, хезмәттәшләре, туганнары, авылдашлары, әдәбият сөюче райондашлары катнашты.

Яшел Үзән районының 14 нче лицееның 1 «Б» һәм 3 «А» сыйныф укучылары «Кышын кошларны ашатыгыз» акциясенә кушылган. Чара кысаларында укучылар белем йорты территориясендә кошлар өчен җимлекләр әзерләп элгән.

Башкортстанда башкорт теле мәсьәләсен сугыш темасы кысрыклап чыгарды. Өстәвенә Русиядәге репрессив кануннар аркасында тел активистларының саны кимегән, кешеләр башкорт теле мәсьәләсен күтәрергә курка.