Новости за 29.03.2024

Төмәннең «Яңарыш» газетасында Римма Умитбаеваның «Ярдәмчел, милләт җанлы, тырыш җитәкче» дигән язмасы чыкты.

5 апрельдә Екатеринбургның «Дом Кино» кинотеатры Зур залында Свердловск өлкәсендә Татарстан киносы көннәренең тантаналы ачылышы була. Бу хакта Татарстанның Свердловск өлкәсендәге Даими вәкиллеге матбугат хезмәте хәбәр итә.

Чирмешәндә «Суган басуы» фестивале була. Әлеге чара Татарстан Республикасында 2024 елда үтәчәк фестивальләр картасына да кертелгән. Аны август аенда, суган уңышы өлгергән вакытта үткәрергә ниятлиләр. Бу хакта «Безнең Чирмешән» хәбәр итә.

Удмуртиянең «Яңарыш» газетасында баш мөхәррир Рәмзия Габбасованың «Туган телебезнең урыны түрдә булсын!» дигән язмасы чыкты.

Республика хакимияте быел февраль аенда туу күрсәткече буенча лидер булган районнарны анализлады. Питрәч районы Татарстанда туучылар саны буенча икенче урында, беренче урында – Биектау районы. Бу хакта «Алга» сайтында хәбәр ителә.

Саба районы Лесхоз урта мәктәбендә РСФСР һәм ТАССРнын атказанган урманчысы Нургали Миңнеханов истәлегенә балалар , яшүсмерләр һәм олылар арасында шахмат буенча районара турнир башланды. Бу хакта https://saba-rt.ru/ хәбәр итә.

Апас районы мәдәният йортында «Татар кызы», «Татар егете» бәйгесендә аграр көллият студентлары катнашты. 7 кыз һәм 7 егет үзләренең сәләтләрен, уңганлыкларын исбатлады. Бу хакта «Апастово-информ» сайтында Ләйлә Шиһабиева хәбәр итә.

Әлмәттә Татарстан мөфтиенең беренче урынбасары, Казан шәһәренең «Кол Шәриф» мәчете имам-хатыйбы Илфар хәзрәт Хәсәнов катнашында шәһәр ифтары узды. Бу хакта «Әлмәт таңнары» район мөхтәсибәтенә сылтама белән хәбәр итә.