Новости за 13.03.2026

Бүген «Казан Экспо» Халыкара күргәзмәләр үзәгендә 14 нче Республикакүләм ифтарга төрле тәм-томнар белән табын корылган иде. Кайнар ризык итеп ит белән карабодай әзерләнгән иде. «Туган авылым» милли-туристлык комплексы хуҗаларының берсе Радик Абдрахманов журналистларга ни өчен карабодай сайланганын аңлатты.

Иртәгә, 14 мартта, Казанда алмашынучан болытлы һава көтелә. Төнлә термометр баганалары 0..-2 градуска кадәр төшәчәк, түбән урыннарда -5 градуска кадәр. Көндез һава +8..+10 градуска кадәр җылыначак. Көньяк-көнбатыштан, көнбатыштан 5-10 м/с тизлек белән җил исәчәк, юлларда элеккечә бозлавык сакланачак.

Бүген Татарстан Республикасы Премьер-министры урынбасары, Бөтендөнья татар конгрессы Милли Шура рәисе Васил Шәйхразыев эш сәфәре белән Ульяновск өлкәсенә килде. Анда ул эш сәфәре кысаларында «Ульяновск өлкә ифтары-2026» чарасының мәртәбәле кунагы булды. «Идел Спорт Арена» спорт сараенда узган әлеге мәҗлестә төбәк Губернаторы Алексей Русских да катнашты. Бу хакта Бөтендөнья татар конгрессы яза.

Ел саен Республикакүләм ифтар үткәрүдә үсеш күзәтелә, ел да берәр эксперимент рәвешендә ниндидер яңалык өстәлә. Татарстан мөфтие Камил хәзрәт Сәмигуллин бүген «Казан-Экспо» күргәзмәләр үзәгендә журналистларга шулай дип белдерде. «Киләсе елга 15нче юбилей ифтарына тагын берәр яңалык кертербез», – диде.

Уфада өченче тапкыр татарча яшьләр стендапы үтте. Татарча шаярту юнәлешен үстерү теләге кабынган яшьләр өчен шат кәеф кичәсен Бөтендөнья татар конгрессы ярдәмендә «Татарча фатирник» оештырды. Бу көнне зур сәхнәгә тәҗрибәсе булганнар белән бергә көлдереп карарга җөрьәт итүче егет-кызлар да чыкты, дип хәбәр итә Бөтендөнья татар конгрессы матбугат хезмәте.

Ульяновск шәһәренең яңа урамы Советлар Союзы Герое Федор Баталов исемен йөртәчәк. Губернатор Алексей Русских гражданнарны шәхси мәсьәләләре буенча кабул итү барышында әнә шундый карар кабул итте, дип яза Бөтендөнья татар конгрессы матбугат хезмәте.

Бүген, Рамазан-шәриф аеның соңгы җомгасында, бөтен дөньяда Халыкара Әл-Кодүс көне билгеләп үтелә. Әлеге чараларда мөселман өммәте Фәләстыйн халкына теләктәшлек белдерә һәм киң җәмәгатьчелекнең игътибарын Фәләстыйн мәсьәләләренә юнәлтә. Мәрҗани мәчетендә бу уңайдан шулай ук чара узды.

Иртәгә, 14 мартта, Татарстан Республикасы башкаласында язгы авыл хуҗалыгы ярминкәләре башлана. Шәһәрлеләр яшелчә, ит продукциясе, шулай ук ярдәмче хуҗалык ихтыяҗлары өчен кирәкле товарларны ваклап сату бәяләреннән 15 процентка кадәр арзанрак бәядән сатып алырга мөмкин.

Яр Чаллыда «Сәүдә кварталы» сәүдә үзәгендә янгын чыккан. «Татар-информ» га Россия Гадәттән тыш хәлләр министрлыгының ТР буенча Баш идарәсе матбугат хезмәтендә хәбәр итүләренчә, янгын беренче катта чыккан – кибетләрнең берсенең ярдәмче бүлмәсендә тартмалар янган. Янгынның якынча мәйданы 0,5 кв. м тәшкил иткән.

Казанда бер сәгать эчендә биш күпфатирлы йортта газ агымын теркәгәннәр. ТР торак инспекциясе мәгълүматы буенча, инцидентлар Гарифьянов, Зорге, Тынычлык, Годовиков һәм Восстание урамнарында булган.

13 мартта «ИДЕЛ» яшьләр журналы СØЮ һәм AIGYR башкаручылары катнашында «Нигә?» исемле яңа сингл чыгарды. Трек Yummy Music лейблында дөнья күрде һәм барлык музыкаль платформаларга урнаштырылды. Сингл белән бер үк вакытта клип та тәкъдим ителде. Аны «ИДЕЛ» журналының барлык социаль челтәрләрендә карап була.

Татарстан Юстиция министрлыгында «Герой ана» исеменә лаек булган күп балалы аналарга җир кишәрлекләре бирүгә юнәлдерелгән закон проекты хупланды, дип хәбәр итә ведомствоның матбугат хезмәте.

Мотоцикллар, пилотсыз очкычлар, мунча мичләре һәм төзелеш материаллары махсус операция зонасына «Балаларга һәм яшьләргә ярдәм фонды» хәйрия оешмасы көче белән китерелде. Бу хакта «Татар-информ»га оешма вәкилләре сөйләде.

Быел Казан укучылары арасында БДИ тапшыру өчен иң кирәкле дисциплиналар профильле математика, җәмгыять белеме һәм информатика булды. Барлыгы Казанның 6,7 мең чыгарылыш сыйныф укучысы имтихан тапшыра, дип хәбәр итә шәһәрнең рәсми порталы.

Бу минутларда "Казан-Экспо" үзәгендә Республикакүләм ифтар мәҗлесенең рәсми өлеше башланды.

Бүген татар җәмәгатьчелеге Казанның Чистай урамы, 4 нче йорт адресы буенча журналист, галим, педагог Флорид Әгъзамов (1936-2005) яшәгән йорт диварында урнаштырылган истәлек тактасына чәчәкләр салды. Матбугат чаралары җитәкчеләре, Флорид Әгъзамовта белем алган шәкертләре күңелләрендәге иң җылы хатирәләре белән уртаклашты.

10 мартта Самараның «Яктылык» мәктәбендә икенче тапкыр «Авыз ачу» мәҗлесе узды. Балалар өчен «Коръән уку» һәм «Азан» конкурслары оештырылды. Бу хакта «Самар татарлары» хәбәр итә.

Ульяновск өлкәсендә ана теле hәм әдәбияты укытучыларының төбәкара форумы уза. Анда өлкә мәктәпләренең рус, татар, чуваш, мордва теле укытучылары катнаша. Бу хакта «Өмет» газетасының телеграм-каналында хәбәр ителә.

Татарстан Рәисе Рөстәм Миңнеханов Бәһрәйн Короле Хамад Ибн Иса Әл Хәлифә белән телефоннан сөйләште. Бу хакта MAX мессенджерында ТР Рәисе матбугат хезмәте җитәкчесе Лилия Галимова хәбәр итте.

Соңгы 30 елда тулаем төбәк продукты өч мәртәбә арткан вакытта Татарстан атмосферага чыгарылган пычрак матдәләрне 25,6 процентка, пычрак су калдыкларын 68 процентка киметә алды. Бу хакта бүген Татарстан Республикасы Рәисе Рөстәм Миңнеханов Иннополиста Россия Табигатьтән файдалану өлкәсендә федераль күзәтчелек хезмәте Идел-Кама төбәкара идарәсенең йомгаклау киңәшмәсендә хәбәр итте.

Уфада Башкортстан Республикасы Мөселманнары Диния нәзарәте оештырган республика ифтары узды. Чара дәүләт хакимияте органнары, руханилар, иҗтимагый оешмалар, милли-мәдәни берләшмәләр вәкилләре, махсус хәрби операциядә катнашучылар, эшмәкәрләрне берләштерде. Бу хакта Бөтендөнья татар конгрессының Башкортстан Республикасындагы вәкиллеге хәбәр итә.

Тыныч тормышка кайткан махсус хәрби операциядә катнашучыларның 55 проценттан артыгы эшкә урнаштырылган яки эшмәкәрлек белән шөгыльләнә. Бу хакта РФ Хезмәт һәм социаль яклау министры Антон Котяков ведомство коллегиясенең киңәйтелгән утырышында хәбәр итте, дип яза РИА Новости.

«Нәтиҗә бар!» төбәк хисап-программа форумы 16 мартта Казанда узачак. Анда ТР Рәисе Рөстәм Миңнеханов, ТР Дәүләт Советы Рәисе Фәрит Мөхәммәтшин, сенаторлар, депутатлар, партпроектлар координаторлары, активистлар, бизнес, министрлыклар һәм районнар вәкилләре катнашачак, дип хәбәр итә «Бердәм Россия» рәсми порталы.

Мәскәү һәм Казан арасында иҗади күпер салучы артист, музыкаль продюсер, Татарстанның халык артисты Айдар Сөләйманов федераль дәрәҗәдәге зур музыкаль проектларның эчке кухнясын белә, йолдызлар белән эшли, әмма тамырлары белән татар мохитенә тартыла.

18 мартта 19.00 сәгатьтә «Шәрык клубы»нда татар телен өйрәнү, татарча иркен сөйләшү, татар мәдәниятен, тарихын һәм фольклорын яхшырак аңлау максатыннан «Тел ачкычы» – татар телен өйрәнү клубы дәресләре башлана. Дәресләрне КФУ укытучысы, Татарстанның атказанган матбугат һәм массакүләм коммуникацияләр хезмәткәре, блогер, журналист Рәмис Латыйпов алып барачак.