Буран аркасында Казан юлларында 10 баллы бөкеләр барлыкка килгән
(Казан, 2 март, «Татар-информ», Полина Шевчук). Буран чыгу сәбәпле Казанда 10 баллы бөкеләр хасил булган. «Яндекс. Пробки» порталы мәгълүматлары буенча, хәрәкәт итүдә кыенлыклар шәһәрнең барлык районнарында күзәтелә. Инде гадәткә кергән бөке Себер тракты ягына таба Ямашев проспектында барлыкка килгән. Минск урамы чатыннан Академик Губкин урамы чатына кадәр Җиңү проспектында, Гвардия, Патрис Лумумба, Гадел Кутуй, Чуйков урамнарында, Әмирхан проспектында һәм Декабристлар урамында да («Яшьлек» метро станциясе янында) шул ук хәл күзәтелә.
Шәһәр үзәге аша эшкә баручы машина йөртүчеләргә дә бөкедә шактый вакытын сарыф итәргә туры киләчәк. Болай да гади булмаган вазгыятьне күпсанлы аварияләр тагын да катлауландыра.