Татарстанда узган тәүлектә тагын 38 кеше коронавирус йоктырган
(Казан, 28 март, «Татар-информ»). Татарстанда узган тәүлектә яңа Covid-19 коронавирусының 38 очрагы теркәлгән. Алар арасыннан бер кеше генә авыруны читтә йоктырган. Бу хакта ТР Сәламәтлек саклау министрлыгының матбугат хезмәте хәбәр итә. «Унөч кеше хастаханәгә урнаштырылды, 25 кеше өйдә дәвалана», - диделәр ведомствода. Авыручыларның күбесе Казанда, башкалада 17 кеше чир йоктырган. Инфекциялеләр саны буенча республиканың башка муниципалитетлары арасында Чаллы алда бара, анда сигез авыру ачыкланган. Covid-19 авырулары барлыгы 11 муниципаль берәмлектә теркәлгән. Пандемия башланганнан бирле республикада авыруның 19 310 очрагы расланган. Татарстанның 16 111 кешесе сәламәтләнгән, шул исәптән 49ы - узган тәүлектә.